Faet Againstim Poor Living​—Faet wea No Savve Win?

OLKETA tourist wea visitim United Nations long New York City lukim datfala Economic and Social Council Chamber, and olketa wata pipe wea no kava long ceiling bilong datfala pablik area. Man wea leadim pipol for lukluk long ples hia sei: “Datfala ceiling wea olketa ‘no finisim’ hem olsem wanfala saen for mekem pipol remember hao waka bilong United Nations saed long living and selen hem no savve finis; disfala waka for mekem living bilong pipol long world kamap moabeta bae stap for olowe.”

Nomata datfala Council disaed strong for duim gudfala waka for mekem living kamap moabeta for evriwan, luk olsem waka olsem bae go ahed for olowe. Hem interesting hao, long taem bilong ministry bilong Jesus Christ long earth long first century C.E., hem sei: “Spirit bilong Jehovah hem stap long mi, from hem anointim mi for talemaot gud nius long poor pipol.” (Luke 4:18) Wanem nao datfala “gud nius” wea hem talemaot? Hem message abaotem datfala Kingdom wea Jehovah God, wea kamap “wanfala strongfala haos long poor man long hardfala taem,” bae startim witim Jesus Christ olsem King. Wanem nao bae datfala Kingdom duim? Isaiah talem profesi: “Jehovah bilong olketa army bae mekem for evri pipol . . . wanfala feast bilong olketa nambawan kaikai, wanfala feast bilong barava gudfala wine, bilong nambawan kaikai wea gud tumas, witim barava gudfala wine. Hem bae finisim dae evribit, and Sovereign Lord Jehovah bae aotem evri krae from evri feis.”—Isaiah 25:4-6, 8.

Waswe, iu laek for savve moa abaot hao Kingdom bilong God bae “mekem living bilong pipol long world kamap moabeta,” mekem no eniwan garem poor living? Luk long daon for faendaot hao wanfala teacher savve visitim iu for showim iu moa samting abaotem wanem Bible talem abaotem samting olsem.