Samting wea Distroem Tree

LONG taem bilong Bible, pipol ting long tree olsem samting wea garem hae price. Olsem example, taem Abraham baem beregraon for waef wea hem lovem, Sarah, olketa tree tu stap insaed list long agreement for baem land.—Genesis 23:15-18.

Distaem tu, pipol tinghae long olketa tree, and long planti kantri pipol tingting strong for sevem olketa forest. Datfala buk State of the World 1998 hem sei: “Nomata planti pipol long olketa kantri long north feel sorre long olketa tropical forest, olketa maet no luksavve hao olketa forest long kantri bilong olketa hem kamap olsem smol sekson nomoa and isi for kasem problem.” Wanem nao savve spoelem health bilong olketa forest long olketa north kantri bilong Europe and North America? Planti pipol point go long wei for katem daon olketa forest, bat nara samting tu stap wea isisi distroem olketa tree. Wanem nao diswan? Air wea dirty and acid rain. Olketa poison hia savve isisi mekem olketa tree for kamap wik, and mekem hem isi for olketa insect and sik spoelem olketa.

For planti year, olketa wea lukaftarem environment and pipol wea wari abaotem givim warning long need for protectim olketa animal and plant long earth. Long olketa year bilong 1980, bihaen olketa scientist long Germany study abaotem danger wea air pollution and acid rain savve duim long environment, olketa sei: ‘Sapos olketa man no stopem diswan, kasem year 2000, only ples wea pipol savve lukim olketa forest hem insaed olketa old foto and olketa movie.’ Iumi hapi hao paoa bilong earth for mekem laef kamap niu moa hem strong and winim planti samting wea olketa sei bae spoelem hem.

Bat, long bigfala wei, God nao bae duim samting for sevem olketa plant and animal. “Hem watarem olketa maunten from olketa rum bilong hem antap” and “hem mekem green grass grow for olketa animal, and plant wea man savve iusim.” And hem promis “for finisim olketa wea spoelem earth.” (Psalm 104:13, 14; Revelation 11:18) Hem bae nambawan samting taem pipol wea stap long earth bae fit for enjoyim for olowe wanfala world wea free from pollution!—Psalm 37:9-11.