Parents Givim Samting Pikinini Needim!

OLKETA pikinini needim instruction and loving discipline, especially from parents bilong olketa. Wanfala teacher long Brazil, Tania Zagury, hem sei olsem: “Hem wei bilong evri pikinini for laek plei. Hem important for olketa mas garem olketa rul. Parents nao mas givim diswan. Sapos olketa no givim, bae hem hard for kontrolem pikinini.”

Nomata olsem, staka kantri apim wei for man chus seleva and freedom wea man wanwan garem, and diswan mekem hem hard for followim kaen kaonsel olsem. So, wea nao olketa parents savve kasem help? Olketa parents wea fraet long God luksavve pikinini hem “present wea kam from Jehovah.” (Psalm 127:3) Dastawe, olketa luk go long Word bilong God, Bible, for savve hao for bringimap pikinini. Olsem example, Proverbs 13:24 sei: “Man wea no iusim stik hem heitim son bilong hem, bat datwan wea lovem hem lukaotem wei for givim hem discipline.”

Wei wea Bible iusim word “stik” hem no minim wei for whip nomoa; hem minim wei for stretem pikinini. Tru nao, staka taem maet toktok nomoa savve stretem wanfala bighed pikinini. Proverbs 29:17 sei: “Disciplinem son bilong iu and hem bae bringim rest long iu and mekem soul bilong iu hapi fogud.”

Olketa pikinini needim loving discipline for aotem olketa nogud fasin. Strongfala and kaenfala discipline hem pruvim dadi or mami kea for pikinini bilong hem. (Proverbs 22:6) So, parents, no givap! Taem iu followim olketa kaonsel from Bible wea balance and gud, iu bae mekem Jehovah God hapi and kasem respect from pikinini bilong iu.