Wanem Nao Kost Bilong Klinfala Conscience?

“GAVMAN Kasem Order for Tekem Bak R$20,000.” Disfala heding kamap insaed Correio do Povo niuspepa bilong Brazil. Datfala article hem story abaotem Luiz Alvo de Araújo, wanfala wakman bilong post office, wea sellim wanfala pis land long gavman. Bihaen hem givim finis property bilong hem long gavman, Luiz hem sapraes for faendemaot hao olketa peim hem R$20,000 (samting olsem $8,000, U.S.) winim price wea olketa agree long hem!

For givim bak disfala extra selen hem no isi. Taem olketa gavman department fail for stretem diswan, Luiz kasem advaes for peim wanfala lawyer and stretem disfala problem long kot. Judge wea givim order long gavman for tekem bak datfala selen and peim kost bilong kot case, hem sei: “Luk olsem samwan hem mekem mistek, and bikos planti samting mix olabaot long waka bilong gavman, no eniwan savve hao for stretem diswan. Hem firstaem for mi lukim case olsem wea barava difren.”

Luiz, wanfala Jehovah’s Witness, sei: “Conscience bilong mi wea Bible trainim no letem mi for keepim samting wea hem no really bilong mi. Mi mas trae for givim bak datfala selen.”

Planti pipol bae tingim fasin hia olsem barava difren or hard for minim. Bat Word bilong God showim hao olketa tru Christian barava tinghae long wei for keepim klinfala conscience taem olketa deal witim gavman. (Romans 13:5) Olketa Jehovah’s Witness disaed strong for keepim ‘honest conscience and duim evri samting long honest wei.’—Hebrews 13:18.