No Letem Eniwan Giamanim Iu
GIAMAN wei hem start from bifor kam. Wanfala long olketa firstfala samting long history wea olketa recordim hem giaman wei. Hem nao taem wea Satan giamanim Eve long garden bilong Eden.—Genesis 3:13; 1 Timothy 2:14.
Nomata giaman wei hem big tumas long earth start from datfala taem, distaem hem kamap worse. Taem hem storyim samting wea bae happen long taem bilong iumi, Bible givim disfala warning: “Olketa wicked man and man for giaman bae kamap worse, giamanim narafala pipol and olketa seleva tu.”—2 Timothy 3:13.
Giaman wei hem kamap for planti difren reason. Olketa conman giamanim pipol for kasem selen bilong olketa. Samfala man bilong politik giamanim pipol wea votem olketa, from olketa disaed strong for keepim paoa nomata wanem nao kamaot from diswan. Pipol giamanim olketa seleva tu. Winim wei for mas feisim tru samting wea no mekem olketa hapi, olketa mekem olketa seleva for bilivim hao wei for aftarem olketa danger samting olsem wei for smoke, iusim drug, or dirty fasin no savve spoelem man.
Giaman wei saed long religion stap tu. Olketa bigman bilong religion long taem bilong Jesus giamanim pipol. Jesus sei olsem abaotem olketa man for giaman hia: “Olketa nao blind pipol wea leadim nara pipol. Sapos wanfala blind man leadim narafala blind man, tufala evriwan bae foldaon insaed long hol.” (Matthew 15:14) Nara samting tu, pipol giamanim olketa seleva saed long religion. Proverbs 14:12 hem sei: “Long mind bilong man wei bilong hem hem stret, bat wei bilong dae nao stap long end bilong hem.”
Olsem long taem bilong Jesus, olketa samting bilong religion giamanim planti pipol distaem, and iumi no sapraes long diswan! Aposol Paul sei Satan “hem blindim mind bilong olketa wea no biliv, for mekem laet bilong nambawan gud nius bilong Christ, wea hem image bilong God, for no showaot.”—2 Corinthians 4:4.
Sapos wanfala conman giamanim iumi, iumi bae lusim selen. Sapos wanfala man bilong politik giamanim iumi, iumi bae lusim samfala freedom bilong iumi. Bat sapos Satan giamanim iumi and iumi rejectim truth abaotem Jesus Christ, iumi bae lusim laef olowe! So no letem eniwan giamanim iu. Openem mind and heart bilong iu long only samting wea talem truth saed long religion, Bible. Iumi bae lusim barava big samting sapos iumi no duim diswan.—John 17:3.