“Iu Tok Tru, Laef Hem Naes Tumas!”

WASWE, iu laek for lanem really mining bilong laef? Magdalena wea eitin year and hem wanfala Jehovah’s Witness wea stap long Szczecin, Poland, helpem fren bilong hem long hae skul, Katarzyna, for duim diswan. Katarzyna hem no biliv long God, bat taem Magdalena story long hem abaotem Bible, hem showimaot trufala interest.

Nomata Katarzyna tinghae long samting wea Magdalena sharem witim hem from Bible, hem no acceptim evribit. Taem hem story witim Magdalena abaotem olketa tru fren, Katarzyna sei: “Iu garem Bible; iu savve long olketa principle for followim and wea for faendem olketa fren. Bat, waswe long olketa wea distaem hard for acceptim olketa principle hia?”

Wanfala important change kamap taem Katarzyna gogo long London, England. Hem visitim branch office bilong Olketa Jehovah’s Witness long there, and hem tinghae tumas long kaenfala fasin wea olketa showimaot long hem. Simpol akson olsem wei for openem door for hem and wei for showimaot trufala interest long samting wea hem talem muvim hem.

Taem niu year bilong skul hem start long September 2001, Katarzyna disaed for acceptim wanfala Bible study. Hem go ahed for buildimap wei for tinghae long olketa principle bilong Bible and start for followim long living bilong hem evriday. No longtaem go nomoa, hem talem Magdalena: “Mi feel olsem mi startim wanfala niufala laef.” Hem sendem tu wanfala short toktok thru long mobile phone: “Thankiu tumas for study bilong iumi tuday! Iu tok tru, laef hem naes tumas! Hem nambawan samting for savve hu nao iumi shud thankiu long hem for datwan.”