“Tufala Pipol Noknok Long Door”

“HEM tufala year finis from taem wea mifala sorre tumas for lusim smol girl bilong mifala.” Hem nao hao wanfala leta insaed datfala niuspepa Le Progrès hem start, wea olketa pablisim long Saint-Étienne, France.

“Mélissa hem thri month old and kasem datfala sik trisomy 18. Disfala sorre feeling for lusim dota bilong mifala from disfala nogud sik no savve finis. Nomata mifala growap long Catholic religion, mifala garem disfala tingting evritaem ‘God, sapos iu stap, why nao iu letem olketa samting olsem happen?’ ” Hem klia, datfala mami wea raetem datfala leta feel sorre tumas and no kasem help. Leta bilong hem go ahed olsem:

“No longtaem bihaen disfala samting happen, tufala pipol noknok long door bilong mifala. Stretawe mi luksavve hem Olketa Jehovah’s Witness. Mi redy for talem olketa for go, bat then mi lukim wanfala brochure wea olketa offerim. Hem abaotem why nao God letem wei for safa. So mi disaed for letem olketa kam insaed haos from mi ting for pruvim long olketa wei wea olketa rong. Mi tingim hao famili bilong mi safa tumas nao and mifala taed for herem olowe olketa toktok olsem ‘God givim Mélissa long mifala, and God tekem hem awe.’ Tufala Witness hia stap winim wan hour. Olketa lisin long mi witim fasin for kea, and taem olketa go, mi barava feel gud winim bifor so mi agree for tufala visitim mi moa. Diswan hem tufala year bifor. Mi no kamap wanfala Jehovah’s Witness, bat mi start for studyim Bible witim olketa, and mi attendim olketa meeting bilong olketa evritaem wea mi fit for duim.”