Waswe, Man Needim Gudfala Advaes?

DISTAEM, staka sei olketa savve luksavve wanem hem gud and nogud and olketa garem right for duim eniting olketa laek for duim. Olketa narawan sei eniting hem gud nomoa sapos hem mekem man hapi. Marit and famili laef wea hem faondeson bilong community hem barava kamap nogud.—Genesis 3:5.

Tingim Verónica,a wea stap long Mexico. Hem sei olsem: “Klosap end long mek-15 year long marit bilong mi, hasband bilong mi talem mi hem frenim wanfala woman. Hem sei from woman hia hem young and mekem hem hapi, hem bae no lusim hem. Mi seke tumas taem mi tingim hao hasband bilong mi wea mi ting long hem olsem best fren bilong mi bae no stap witim mi nao. Mi savve garem tingting hao dae bilong olketa wea iumi lovem nomoa savve mekem man feel sorre tumas winim eni nara samting. Bat for saed bilong mi, adultery nao kosim barava bigfala pain from mi lusim samwan wea mi lovem tumas and hem go ahed duim olketa samting wea mekem mi sorre fogud.”

Tingim tu wanfala man wea 22 year wea divorce bat hem no willing for acceptim olketa responsibility bilong hem olsem wanfala dadi. Hem expectim mami bilong hem nao for lukaftarem hem and boy bilong hem. Sapos mami no duim evriting hem laekem, hem kamap kros and tok spoelem hem, olsem nao wanfala noti pikinini. Mami bilong hem no savve wanem for duim taem hem duim diswan.

Staka pipol kasem olketa problem olsem. Wei for separate and divorce hem kamap big tumas evriwea. Staka pikinini lukim mami or dadi lusim famili for go stap witim samwan. Samfala young wan lusim nao wei for respectim nara pipol, wea insaed diswan hem parents bilong olketa tu, and olketa duim olketa nogud samting wea young pipol bifor no savve duim. Long staka kantri wei for duim sex witim olketa difren wan, iusim drug, attakim pipol, wei wea olketa young wan killim dae olketa teacher or parents hem kamap big tumas. And maet iu lukim tu hao wei for trainim pikinini and marit hem no only samting wea world distaem faendem hard for deal witim.

Taem iumi lukim olketa samting hia, maet iumi tingting wanem nao happen long world? Sapos pipol barava savve long wanem hem gud and nogud, why nao pipol no savve stretem staka problem? Waswe, eni need stap for pipol kasem gudfala advaes? Long wea nao iumi savve kasem gudfala advaes wea iumi fit for trustim? Nomata staka sei olketa bilivim God and Word bilong hem, diswan nating showaot long wanem olketa disaedem. Bat, olketa wanem gud samting nao iumi savve kasem taem iumi luk aotem and acceptim advaes bilong God? Iumi bae storyim diswan long next article.

[Footnote]