Gudfala Fasin ‘Mekem Teaching Bilong God Luk Naes Tumas’

MARIA, wanfala young girl long Kransnoyarsk, wanfala taon long Russia, savve singsing gud tumas, gogo teacher bilong hem laekem hem for joinim choir bilong skul. No longtaem bihaen, Maria story witim respect long wanfala teacher and explainim hao hem bae no singim samfala song. Why nao olsem? Bikos for singim olketa lotu singsing hem againstim biliv bilong hem from Bible. Teacher hem sapraes and ting, ‘Wanem nao rong witim wei for givim glory long God long singsing?’

For showim reason why hem bae no singim singsing abaotem Trinity, Maria openem Bible bilong hem and explainim hao God and Jesus Christ tufala no wan God, and holy spirit hem paoa bilong God. (Matthew 26:39; John 14:28; Acts 4:31) Maria sei olsem: “Diswan hem no spoelem wei wea mi and teacher bilong mi fren. Klosap evri teacher long skul bilong mifala barava gud. Olketa laekem mifala for no hol bak for talemaot tingting and feeling bilong mifala.”

Olketa teacher and skulfren bilong Maria respectim hem for datfala full year. Maria sei: “Olketa principle bilong Bible nao helpem laef bilong mi. Taem skul finis long end long year, mi kasem prize for honest and gudfala fasin bilong mi, semtaem, mami and dadi bilong mi kasem wanfala leta from skul wea talem thankiu for gudfala wei wea tufala teachim mi.”

Long August 18, 2001, Maria baptaes. Hem sei: “Mi hapi tumas for servem datfala nambawan God, Jehovah!” Olketa young Witness bilong Jehovah evriwea long world followim evribit toktok bilong Titus 2:10, wea sei: “Mekem teaching bilong Man for sevem iumi, God, luk naes tumas long evri samting.”

[Piksa long page 32]

Maria witim mami and dadi bilong hem bihaen Maria baptaes

[Piksa long page 32]

Leta for sei thankiu and certificate for gudfala fasin