Waswe, Staka Information Tumas Stap?
Wanfala hasband and waef wea missionary sidaon long sandbis long West Africa and lukluk go long moon. Then hasband hem sei: “Haomas savve nao man garem abaotem moon, and haomas savve stap wea hem no kasem yet?”
Waef bilong hem ansa olsem: “Hao sapos iumi savve lukluk long earth long sem wei wea iumi lukluk long moon distaem—haomas savve nao man garem finis, and haomas savve nao man no garem yet? And tingim! Earth no just go raonem sun nomoa, bat full solar system wea iumi insaed hem mumuv tu. Datwan minim maet no enitaem bihaen, earth bae stap long barava sem ples long universe wea hem stap distaem. Tru nao, only wei iumi savve wea nao earth hem stap hem from iumi luksavve long position bilong sun and samfala star. Iumi garem bigfala savve abaotem samfala samting, bat really, iumi no barava savve wea nao earth hem stap!”
OLKETA point hia wea tufala storyim barava tru. Luk olsem staka information tumas stap for lanem. Iumi wanwan lanem olketa niu samting evriday. Bat, nomata haomas samting iumi lanem, iumi no savve kwiktaem lanem evri samting wea iumi laek savve.
Tru nao, wei wea man savve kasem niu information and keepim information hem kamap barava big distaem. Thru long technology, olketa man keepim staka information. Olketa computer savve keepim barava staka information dastawe olketa mas mekem niu word for olketa samting olsem. Wanfala CD-ROM nomoa savve keepim staka maka staka information; olketa sei hem savve keepim 680 megabytes or information wea winim datwan. Wanfala DVD savve keepim sevenfala taems moa information winim wanfala CD-ROM, and samfala DVD wea keepim information winim datwan kamap distaem.
Samting wea man iusim for keepim and givimaot information distaem hem barava narawe. Olketa bigfala printing machine wea printim niuspepa, magasin and buk, barava waka speed fogud. Man savve kwiktaem kasem staka information sapos hem iusim computer for luk long Internet. Long olketa wei hia and plande nara wei moa, wei for givimaot information hem moa fast winim wanem eniwan savve kasem. Pipol sei wei wea staka information stap hem olsem iumi insaed bigfala sea, wea man mas lane for swim insaed, bat no trae for drinkim full wan. Tru nao, from information hem staka tumas, datwan forcem iumi for chus gud.
Narafala reason why man mas chus gud hem bikos information wea stap hem no evritaem helpem man. For tok stret, samfala information hem nogud. Iumi mas tingim hao savve hem minim information—nomata hem gud wan or nogud wan, nomata hem helpem man or nomoa. Narafala samting wea mekem hem moa hard for man chus gud hem from samfala samting wea pipol sei hem tru, barava no tru! Staka taem nao toktok bilong organization wea pipol tinghae long hem, olketa faendaot hem rong! Olsem example, tingim man wea raet abaotem taon bilong Ephesus bifor, wea pipol long there ting long hem olsem wanfala savveman. Hem sei: “Evriwan savve hao taon bilong Ephesus nao lukaftarem temple bilong Artemis and image wea foldaon from heven.” (Acts 19:35, 36) Nomata staka pipol long datfala taem savve long datwan, and bilivim olsem hem tru evribit, hem no tru hao datfala image foldaon from heven. Dastawe, Bible warnim olketa Christian for keakea long “toktok wea . . . pipol laea for sei hem ‘savve.’”—1 Timothy 6:20.
Wanfala strong reason for chusim gud savve wea iumi kasem, hem bikos laef bilong iumi distaem hem short tumas. Nomata wanem nao age bilong iu, maet iu laek for savve long staka samting, bat iu luksavve bae iu no laef longtaem for savve gud long evri samting hia.
Waswe, enitaem bae man laef longtaem for kasem staka savve? Waswe, wankaen savve hem stap wea bae mekem man laef for barava longtaem, maet for olowe tu? Waswe, kaen savve olsem hem stap finis? Sapos olsem, waswe, bae evriwan fit for kasem? Waswe, enitaem bae savve wea iumi kasem hem wanem iumi laek for kasem—trufala information? Hasband and waef wea missionary wea iumi storyim fastaem kasem olketa ansa wea tufala hapi long hem, and iu tu savve olsem. Plis readim next article, wea bae givim iu hope for kasem savve for olowe.