Olketa Sharem Gud Nius Witim Pipol wea Earpas

“OLKETA tekem kam spiritual samting long iufala!” Hem nao wanem boss bilong wanfala hospital for lukaftarem olketa olo long Navalcarnero long Madrid, Spain, sei abaotem visit bilong Olketa Jehovah’s Witness long hospital bilong hem. Why nao hem talem datwan?

Samfala olo wea stap long Rosas del Camino hospital, olketa earpas. Nomata olsem, from olketa Witness trae hard for lanem Spanish Saen Languis, olketa savve story witim olketa hia wea earpas. Datfala boss praisem olketa Witness from olketa nating askem selen for taem wea olketa teachim pipol hia, wea needim extra help for savve long wanem nao Bible teachim. Hem lukim olketa olo hia kasem gud samting from disfala teaching bilong gud nius abaotem Kingdom. And olketa olo—main wan nao olketa wea blind or wea earpas—barava tinghae long visit bilong olketa Witness tu.

Eulogio, wanfala long olketa wea blind and earpas, distaem hem studyim Bible witim Olketa Jehovah’s Witness. Wanfala day taem study gohed, nara olo man kam and givim wanfala pepa wea olketa raetem wanfala story for datfala Witness, for showimaot thankiu bilong olketa. Title bilong datfala story hem, “Kamap Wanfala Witness.” Wanfala part long datfala story hem sei: “Olketa garem gud laef wea followim order, and from Jehovah olketa kasem nambawan wisdom. Olketa go and kam long evri haos bikos olketa trustim Jehovah.”

Datfala wei for trust long Jehovah nao muvim staka Witness evriwea long world for lanem saen languis for olketa wea earpas long kantri bilong olketa. Diswan mekem olketa sharem message abaotem hope wea stap long Bible for encouragem olketa wea earpas.