Samting wea Adryana Barava Laek for Duim
ADRYANA, wanfala gele wea six year from Tulsa, Oklahoma, U.S.A., barava laek for duim wanfala samting. Datfala samting maet hem semsem witim wanem David wea raetem psalm hem laek for duim from hem singsing olsem: “Wanfala samting nao mi askem long Jehovah, hem nao samting wea mi bae lukaotem, for mi savve stap insaed long haos bilong Jehovah for full laef bilong mi, for lukim olketa naesfala fasin bilong Jehovah and for lukluk witim wei for tinghae long temple bilong hem.”—Psalm 27:4.
Taem Adryana six month nomoa, hem garem cancer wea savve grow long olketa difren part bilong body bilong hem. Disfala barava nogud sik wea savve killim man dae hem mekem hem no savve muvim tufala leg bilong hem. Olketa doctor duim plande operation long hem and hem kasem treatment wea olketa kolem chemotherapy for wanfala year.
Dadi bilong Adryana wea no garem sem biliv olsem Adryana and mami bilong hem, story witim wanfala organization wea savve helpem olketa pikinini wea garem barava nogud sik olsem for duim samting wea olketa barava laek for duim. Dadi bilong hem askem disfala organization sapos dota bilong hem savve visitim wanfala spesol ples for olketa pikinini pleiplei and duim enikaen interesting samting. Bifor organization hia letem Adryana for duim datwan, olketa askem hem samfala kwestin. Adryana talem thankiu long olketa for samting wea olketa laek duim for hem, bat hem talem hao hem barava laek for visitim Bethel long New York, wea hem headquarter bilong Olketa Jehovah’s Witness evriwea long world. Bihaen Adryana faendemaot hao dadi bilong hem nao arrangem diswan, hem prea long Jehovah for givim hem chance for visitim Bethel. Nomata olketa bilong datfala organization tingse hao bae hem no interesting for wanfala pikinini visitim wanfala organization bilong religion and hao Adryana bae interest nomoa for duim olketa samting wea olketa nara pikinini laek for duim, olketa arrangem hem for go from dadi bilong hem no stopem hem.
Datwan nao hem firstaem wea Adryana go long New York for visitim Bethel witim mami bilong hem, big sista bilong hem, and wanfala fren bilong olketa. Adryana hem sei: “Jehovah ansarem prea bilong mi. Mi savve hem bae welkamim mifala long Bethel. Mi lukim wei wea olketa wakem olketa buk, magasin, and Bible. Hem barava naes winim ples wea olketa pikinini savve pleiplei long hem and duim enikaen interesting samting.”
Adryana barava “lukim olketa naesfala fasin bilong Jehovah” and tinghae long waka wea gohed distaem long headquarter for organizem waka bilong pipol bilong Jehovah evriwea long world. Mifala welkamim iu tu for visitim Bethel. And witim world headquarter bilong Olketa Jehovah’s Witness wea stap long New York, olketa branch office tu stap long olketa difren kantri long world.