Samfala Ask Olsem
Why Nao Olketa Jehovah’s Witness No Faet Long War?
Nomata wea nao Olketa Jehovah Witness stap, olketa no faetem olketa nara kantri or olketa nara pipol long sem kantri. Australian Encyclopædia long 1958 hem talem olsem: “Olketa Jehovah’s Witness olketa nating sapotim war.”
Olketa Jehovah’s Witness no faet long war bikos sapos olketa faet, olketa bae againstim nao wanem olketa lanem long Bible. Tingting bilong olketa hem followim samting wea Lord Jesus Christ talem and wei bilong hem. Hem talem pipol wea followim hem for lovem neiba bilong olketa. Hem talem olketa tu: “Gohed lovem olketa enemy bilong iufala, duim gudfala samting long olketa wea heitim iufala.” (Luke 6:27; Matthew 22:39) Taem wanfala disaepol holem naef for protectim Jesus, Jesus sei long hem: “Iu no duim olsem. Leavim naef ia. Eniwan wea iusim naef for killim dae narawan, bae olketa iusim naef for killim hem dae tu.” (Matthew 26:52) So samting wea Jesus hem talem and duim showimaot hao olketa wea followim hem mas no iusim olketa samting for faet.
Nara reason why Olketa Jehovah’s Witness no faet long war hem bikos olketa no stap long wanfala kantri nomoa, bat olketa Witness kam from plande difren kantri. Sapos olketa faet long war, datwan minim olketa faetem nomoa brata bilong olketa nao. Sapos olketa duim datwan, olketa no followim nao wanem Jesus hem talem ‘for lovem narawan.’—John 13:35.
Olketa Jehovah’s Witness no toktok nating nomoa, bat olketa barava showimaot love. Tingim samting wea olketa duim long 1939 go kasem 1945 taem World War II hem gohed. Long America, winim 4,300 Jehovah’s Witness nao stap long prison bikos olketa no laek faet long war. Long England, winim 1,500 Witness stap long prison bikos olketa no sapotim datfala war, and 300 long olketa nao hem olketa woman. Long Germany wea Hitler hem rul, winim 270 Witness dae bikos olketa no laek faet long datfala war. Winim 10,000 Witness long there stap long olketa prison and olketa raf prison. Long Japan tu Olketa Jehovah’s Witness kasem olketa nogud samting. Sapos eniwan long famili bilong iu hem dae long World War II or long eni nara war, iu mas savve hao hem no wanfala Jehovah’s Witness nao wea killim hem dae.
Tingting bilong Olketa Jehovah’s Witness abaotem war hem semsem olsem samting wea Wolfgang Kusserow from Germany hem talem. Long 1942 army bilong Hitler aotem hed bilong hem bikos hem no laek faet long war. Hem 20 year nomoa. (Isaiah 2:4) Hem story olsem long kot case bilong hem: “Mi big kam olsem wanfala Jehovah’s Witness and mi followim toktok bilong God long Bible. Nambawan law wea holy and wea hem givim long olketa man hem olsem: ‘Iu mas lovem God bilong iu winim eni nara samting and iu mas lovem narawan long sem wei wea iu lovem iuseleva.’ Olketa nara law hem olsem: ‘Iu mas no killim dae narawan.’ Waswe, Creator hem givim disfala law for olketa tree nao followim?”—Mark 12:29-31; Exodus 20:13.
Olketa Jehovah’s Witness bilivim hao Jehovah nomoa wea garem evri paoa, hem nao bae mekem pipol garem peace for olowe. Olketa Witness trustim hem from olketa savve hem bae “finisim olketa war long evri ples long earth.”—Psalm 46:9.