Jesus Christ—Message Bilong Hem Helpem Pipol Distaem Tu
“Samting wea datfala man [Jesus] wea kam from Capernaum duim taem hem stap long earth helpem staka pipol distaem tu. Datwan showimaot hem man wea barava wise.”a—AUTHOR GREGG EASTERBROOK.
TOKTOK bilong iumi savve barava helpem man. Olketa gudfala toktok savve kasem heart bilong man, mekem man garem hope, and barava changem laef bilong man. No eniwan talem samting wea barava helpem olketa man winim wanem Jesus Christ talem. Wanfala man wea herem Jesus taem givim datfala Sermon Long Maunten sei: “Bihaen Jesus storyim olketa samting hia, pipol wea lisin kam olketa barava sapraes nao long hao hem teach.”—Matthew 7:28.
Distaem tu, plande pipol savve long staka toktok wea Jesus talem. Tingim samfala samting wea hem talem wea barava helpem pipol.
“Iufala no savve worshipim God and long semtaem busy for kasem staka selen.”—Matthew 6:24.
“Samting wea iufala laekem pipol for duim long iufala, sem samting nao iufala mas duim long olketa.”—Matthew 7:12.
“Givim go bak long King samting wea hem bilong King, and givim go bak long God samting wea hem bilong God.”—Matthew 22:21.
“Man wea givim samting hem barava hapi winim man wea kasem samting.”—Acts 20:35.
Bat Jesus no talem nomoa olketa samting wea pipol rememberim. Message bilong hem garem paoa bikos hem storyim tru samting abaotem God, teachim pipol wanem olketa savve duim for hapi, and mekhae long Kingdom bilong God wea bae finisim evri samting wea mekem pipol safa. Taem iumi story abaotem disfala message long olketa nextfala article, bae iumi lanem why nao olketa samting wea Jesus talem and duim ‘barava helpem staka million pipol distaem.’
[Footnote]