Waswe, Iu Tingim Yet?
Waswe, iu lanem gud samting from olketa Wastaoa magasin wea iu readim no longtaem go nomoa? Trae for ansarem olketa kwestin hia:
Why nao example bilong Solomon hem olsem wanfala warning for iumi?
God blessim and iusim King Solomon. Bat taem hem rul, hem no gohed followim kaonsel bilong God. Hem maritim dota bilong Pharaoh wea no worshipim God, hem tekem staka waef, and hem letem olketa woman hia for isisi mekem hem worshipim olketa false god. Iumi mas stap klia long wei for isisi garem rong tingting, or for disaedem samting wea bae mekem iumi kasem olketa nogud samting. (Deut. 7:1-4; 17:17; 1 Ki. 11:4-8)—12/15, pages 10-12
Hu long olketa wea raetem olketa Christian Greek Scripture nao stap long Jerusalem long Pentecost 33 C.E.?
Luk olsem sixfala long eitfala man wea raetem olketa Christian Greek Scripture stap long Jerusalem long Pentecost 33 C.E. Matthew, John, and Peter nao thrifala aposol wea stap long there. James and Jude, tufala haf brata bilong Jesus tu stap long there. And hem luk olsem Mark tu hem long there.—1/1, page 18.
Hao nao iumi savve samfala anointed Christian stap long earth start long first century kam kasem distaem?
Long tokpiksa bilong Jesus abaotem “wheat” and “rabis grass,” “olketa gudfala seed” piksarem “olketa son bilong Kingdom.” (Matt. 13:24-30, 38) Wheat bae grow tugeta witim rabis grass go kasem taem bilong harvest. So start kam long first century samfala anointed Christian stap long earth nomata iumi no barava savve hu nao olketa hia.—1/15, page 7.
Wanem nao bae helpem iumi for no jealous?
For helpem iumi no jealous, iumi savve duim olketa samting hia: Lovem olketa brata and sista, kaban witim pipol wea worshipim Jehovah, traem best for duim gudfala samting, and ‘taem pipol hapi, iumi mas hapi witim olketa.’ (Rom. 12:15)—2/15, pages 16-17
Taem iumi givim advaes, wanem nao iumi mas tingim?
Luksavve long samting wea kasem man. No kwiktaem for givim advaes. Hambol and followim wanem Bible talem. Iusim olketa Bible pablikeson. No mekem disison for narawan.—3/15, pages 7-9.