Kwestin From Reader

Wanem nao hem minim taem Bible sei “hem nogud samting long Jehovah for olketa wea faithful long hem for dae”?

▪ Man wea raetem psalm hem sei: “Hem nogud samting long Jehovah for olketa wea faithful long hem for dae.” (Ps. 116:15) Laef bilong evriwan wea worshipim Jehovah hem spesol long hem. Bat toktok long Psalm 116 no storyim dae bilong wanfala man nomoa.

Taem brata duim funeral tok for wanfala Christian wea faithful, hem no fitim for hem sei Psalm 116:15 hem fitim disfala Christian wea dae. Why nao olsem? Bikos datfala verse hem garem difren mining. Diswan minim God bae no letem evri faithful wakaman bilong hem for dae bikos datwan bae nogud tumas long hem.—Lukim Psalm 72:14; 116:8.

Psalm 116:15 showimaot Jehovah bae no letem eniwan for finisim evriwan wea faithful long hem. History bilong Olketa Jehovah’s Witness showimaot olketa kasem staka test and persecution bat olketa gohed and no givap. Diswan pruvim God bae no letem eniwan for finisim pipol bilong hem.

From Jehovah hem garem bigfala paoa and bae no letem eni samting spoelem plan bilong hem, hard for hem letem eniwan finisim evri pipol bilong hem. Sapos hem letem datwan for happen, datwan bae showimaot enemy bilong hem strong winim hem, and plan bilong hem for earth fulap long pipol wea faithful bae no kamap tru. (Isa. 45:18; 55:10, 11) Sapos evri pipol bilong Jehovah finis, bae no eniwan stap for worshipim Jehovah long nambawan spiritual temple bilong hem long earth! Bae no eniwan stap for kamap datfala “niu earth.” Datfala “niu earth” hem olketa raeteous pipol wea bae stap long earth anda long datfala “niu skae.” (Rev. 21:1) And tu, bae Christ hem no rul for 1,000 year bikos bae no eniwan stap for hem rulim.—Rev. 20:4, 5.

Pipol bae daotem paoa wea God hem garem from hem Haefala Ruler bilong universe sapos hem letem olketa enemy bilong hem for finisim evri pipol bilong hem long earth. From Jehovah hem tingim holy nem bilong hem and “no enitaem hem duim samting wea no stret,” hard for hem letem eniwan for finisim evri faithful wakaman bilong hem. (Deut. 32:4; Gen. 18:25) Tingim tu, sapos hem letem datwan for happen, datwan bae againstim samting wea Bible talem. Hem sei: “Jehovah bae no lusim pipol bilong hem bikos long nambawan nem bilong hem.” (1 Sam. 12:22) Olsem Bible talem, “Jehovah bae no lusim pipol bilong hem, and hem bae no lusim olketa wea bilong hem.”—Ps. 94:14.

Iumi hapi for savve Jehovah bae nating letem olketa enemy for finisim evri pipol bilong hem! So iumi mas faithful long God and trustim disfala promis bilong hem: “Eni weapon wea pipol wakem for againstim iufala bae no spoelem iufala, and eni toktok for spoelem iufala bae iufala pruvim hem no stret. Diswan nao samting wea olketa wakaman bilong Jehovah bae kasem. Long tingting bilong mi, olketa raeteous.”—Isa. 54:17.

[Blurb long page 22]

God bae no letem eniwan for finisim evri pipol bilong hem