Wei for Kaen Hem Daonem Kros
GEORGE and Manon, tufala Witness long Netherlands, storyim gud nius abaotem Kingdom long wanfala olo woman, bat hem no tok kaen long tufala. Datfala woman, wea nem bilong Rie, hem marit tufala taem bat tufala hasband evriwan dae, and wanfala son bilong hem dae tu. Hem garem tu datfala sik arthritis. Taem tufala gohed story witim hem kros bilong hem katdaon lelebet, bat hem no barava hapi for story witim tufala.
Tufala sorre long hem from hem no hapi and luk olsem hem lonely, so George talem Manon maet hem gud sapos tufala go peim samfala flaoa for hem. Taem tufala tekem go bak olketa flaoa hia, Rie hem sapraes and tinghae long datwan. Hem busy long datfala taem, so olketa arrange for visitim hem moa long narataem. Taem tufala go bak long datfala taem no eniwan long haos. Nomata olketa go bak samfala taem moa, hem no stap tu. Gogo, tufala start for tingse hem haed from tufala.
Wanday taem George hem go bak, Rie hem stap long haos. Hem sei sorre from hem no stap taem tufala kam bikos hem admit long hospital. Then hem sei: “Bat iu savve, bihaen iutufala kasem mi lastaem, mi start for readim Bible!” Tufala story gud, and Rie hem agree for studyim Bible.
Taem Rie gohed studyim Bible hem barava change. Hem no woman for kros olowe nao, bat hem woman wea hem hapi and kaen long narawan. Nomata hem no savve lusim haos, hem start for preach long eniwan wea visitim hem. Sik bilong hem mekem hem no savve go olowe long olketa kongregeson meeting, bat hem savve hapi tumas taem olketa brata and sista visitim hem. Taem hem 82 year, hem go long wanfala circuit assembly and hem baptaes for showimaot hem dedicate long God.
Tu-thri month bihaen hem baptaes, Rie hem dae. Olketa faendem wanfala poem wea hem raetem, wea hem storyim feeling for lonely and sorre taem man hem olo, and hao hem important tumas for kaen long narawan. Manon hem sei: “Taem mi readim datfala poem mi barava hapi Jehovah hem helpem mifala for kaen long Rie.”
From Jehovah hem kaen and showimaot love, datwan mekem iumi laek followim example bilong hem for kaen and showimaot love long narawan. (Eph. 5:1, 2) Sapos iumi showimaot iumi olketa wakaman bilong God long wei for “kaen long pipol,” iumi bae kasem gud samting long ministry.—2 Cor. 6:4, 6.