Samting wea Mi Disaedem Taem Mi Pikinini
Taem mi smol boy
Long 1985, taem mi 10 year, samfala pikinini from Cambodia kam skul witim mi long Columbus, Ohio, U.S.A. Wanfala boy savve lelebet long English. Hem iusim olketa piksa for story abaotem pipol wea spoelem nara pipol, killim pipol dae, and hao pipol ranawe from Cambodia. Long naet, taem mi tingim olketa pikinini hia mi savve krae. Mi laek for story long olketa abaotem Paradaes and resurrection hope, bat olketa no savve long English. Nomata mi smol boy nomoa, mi disaed for lanem Cambodian languis mekem mi savve story abaotem Jehovah long olketa. Long datfala taem, mi no savve hao samting wea mi disaedem bae affectim laef bilong mi.
Hem no isi for lanem Cambodian languis. Tufala taem nao mi laek for givap, bat Jehovah iusim dadi and mami for encouragem mi. Gogo olketa teacher and nara student encouragem mi for skul gud mekem mi garem big waka. Bat mi laek for pioneer so mi chusim olketa subject long hae skul wea bae helpem mi for kasem part-taem waka and pioneer. Bihaen skul hem finis, mi savve waka witim olketa pioneer long ministry. Mi volunteer tu for teachim olketa student wea English hem no languis bilong olketa, and bihaen, datwan barava helpem mi.
Taem mi 16 year, mi faendaot wanfala Cambodian grup hem stap long Long Beach, California, U.S.A. Mi visitim datfala grup, and lane for readim Cambodian languis. Taem mi graduate from hae skul, mi pioneer and gohed preach long pipol from Cambodia wea stap klosap long hom bilong mi. Taem mi 18 year, mi tingting for go long Cambodia. Long datfala taem hem no sef ples yet. Bat ten million pipol nao stap long Cambodia and mi savve klosap evriwan long olketa no herem yet gud nius abaotem Kingdom. Wanfala kongregeson wea garem 13 pablisa nomoa stap long full kantri. Firstaem wea mi go long Cambodia mi 19 year. Tufala year bihaen, mi disaed for go stap long there. For kasem need bilong mi, mi waka part-taem olsem transleita and teachim English. Gogo mi maritim wanfala sista wea garem olketa sem goal olsem mi. Mitufala barava hapi for helpem staka pipol long Cambodia for dedicate and baptaes.
Jehovah hem givim mi ‘olketa samting wea heart bilong mi laekem.’ (Ps. 37:4) Waka for teachim pipol for kamap disaepol hem barava mekem man satisfae. Taem mi kam long Cambodia, wanfala kongregeson nomoa hem stap wea garem 13-fala pablisa. Mi stap for 16 year finis and distaem mifala garem 12-fala kongregeson and 4-fala grup!—Story bilong Jason Blackwell.