“Waka for Preach Hem No Finis Yet”

LONG year 1923, staka pipol hipap long wanfala concert hall long São Paulo, Brazil, for herem tok bilong George Young. Taem hem givim datfala tok, semtaem samwan transleitim go long Portuguese languis. Evriwan wea hipap hem 585 pipol, and olketa barava lisin gud. Olketa iusim wanfala projector for showim long screen olketa scripture long Portugese languis. Bihaen long datfala tok, olketa givimaot wan handred copy bilong disfala buklet Millions Now Living Will Never Die! long Portugese languis, and samfala long English, German, and Italian languis. Evriwan laekem datfala tok and bihaen, pipol story abaotem datwan. Tufala day bihaen, staka pipol hipap moa long datfala hall for herem nara tok. Bat wanem nao samfala samting wea happen long Brazil bifor wea mekem staka pipol interest olsem?

Long 1867, Sarah Bellona Ferguson witim famili bilong hem lusim United States and muv go long Brazil. Long 1899, Sarah savve hem faendem truth taem hem readim samfala Bible literature wea brata bilong hem tekem kam from United States. Sarah interest tumas for read, so hem kasem subscription for English Watch Tower. Hem hapi tumas long samting wea hem lanem long Bible, so hem raet go long Brata C. T. Russell and sei man wea stap farawe tumas savve herem gud nius tu, and hem nao wanfala long olketa.

Sarah Ferguson traem best bilong hem for preach long olketa narawan, bat staka taem hem ting raonem sapos eniwan bae helpem hem and famili bilong hem and olketa pipol long Brazil. Long 1912, Brooklyn Bethel talem hem samwan bae kam long São Paulo and tekem kam staka thousand tract wea garem title Where Are the Dead? long Portuguese languis. Long 1915 hem sei hem sapraes hao staka Bible Student tingse klosap bae olketa go ap long heven. Long wanfala leta wea Sarah raetem hem talemaot tingting bilong hem olsem: “Waswe olketa long Brazil and evriwan long South America? . . . Taem iu tingim South America hem wanfala big part long world, hem isi for luksavve waka for preach hem no finis yet.” Samting Sarah talem barava tru. Bigfala waka for preach gohed long olketa year bihaen hem talem datwan!

Long samting olsem 1920, eitfala young navy man from Brazil attendim samfala meeting bilong wanfala kongregeson long New York City taem olketa weitim samfala for duim maintenance long warship bilong olketa. Taem olketa go bak long Rio de Janeiro long Brazil, olketa storyim wanem olketa lanem from Bible long olketa narawan. No longtaem bihaen, long March 1923, George Young, wanfala pilgrim wea distaem iumi kolem traveling overseer, arrive long Rio de Janeiro and hem lukim samfala wea interest long Bible. Hem arrange for transleitim samfala pablikeson long Portuguese languis. No longtaem bihaen, Brata Young go long São Paulo, wanfala taon wea 600,000 pipol nao stap long hem long datfala taem. Long there nao hem givim datfala tok and givimaot datfala buklet Millions Now Living Will Never Die!, wea iumi storyim long paragraf 1. Hem sei: “From miseleva nomoa go long datfala taon, mi mas iusim niuspepa for invaetem pipol for kam herem tok.” Hem sei tu, datwan hem “firstaem wea I.B.S.A. organizem wanfala pablik tok long Brazil and invaetem pipol for kam.”a

Wanfala report abaotem Brazil long The Watch Tower bilong December 15, 1923, hem sei: “Hem naes tumas for lukim wei wea Lord hem blessim datfala waka nomata preaching waka long there hem start long June 1 and olketa no garem eni literature long datfala taem.” Datfala report sei tu, tufala pablik tok wea Brata Young givim long São Paulo hem tufala long 21 tok wea hem givim start long June 1 go kasem September 30. Evriwan wea kam herem olketa tok hia hem 3,600. Long Rio de Janeiro, staka pipol start for herem datfala Kingdom message. And insaed tu-thri month nomoa, olketa pablisa givimaot winim 7,000 pablikeson bilong iumi long Portuguese languis! And tu, olketa start for pablisim The Watch Tower long Portuguese languis, and first magasin hem November-December 1923.

George Young go lukim Sarah Ferguson, and The Watch Tower hem sei: “Datfala sista kam long rum, and firstaem hem no talem eni samting. Hem holem hand bilong Brata Young, and hem luk stret long eye bilong hem, then hem sei: ‘Mi barava hapi for meetim wanfala Pilgrim.’” No longtaem bihaen, Sarah and fofala pikinini bilong hem baptaes. Sarah weit for 25 year then hem just baptaes! Watch Tower bilong August 1, 1924 hem sei 50 pipol nao baptaes long Brazil, and staka long olketa from Rio de Janeiro.

Olketa samting hia happen samting olsem 90 year go finis, and distaem no eniwan bae tingim moa datfala kwestin: “Waswe olketa long Brazil and evriwan long South America?” Distaem winim 760,000 Witness bilong Jehovah preachim gud nius long Brazil. And long olketa nara kantri long South America Olketa Jehovah’s Witness preachim Kingdom message long Portuguese, Spanish, and staka lokol languis tu. Samting wea Sarah Ferguson talem long 1915 hem barava tru, long datfala taem “waka for preach hem no finis yet.”—From branch office long Brazil.