Mi Tingim Miseleva Nomoa

LAEF BILONG MI BIFOR:

Taem mi smol, mi and famili bilong mi stap long Leipzig, East Germany, klosap long border bilong Czechoslovakia and Poland. Taem mi six year, mifala muv go long Brazil and then long Ecuador bikos dadi bilong mi go waka long olketa ples hia.

Taem mi 14 year, dadi and mami sendem mi long wanfala boarding skul long Germany. Tufala stap farawe long South America, so mi mas lukaftarem miseleva. Datwan mekem mi independent and no tingim narawan.

Taem mi 17 year, dadi and mami kam bak long Germany and mi go stap witim tufala. Bat from mi garem wei for independent, mi no savve stap gud witim olketa. Taem mi 18 year, mi go nao from famili bilong mi.

Mi no savve wanem for duim long laef bilong mi, so mi lukluk long difren living bilong pipol. Datwan mekem mi disaed for iusim laef bilong mi for travel long olketa nara kantri and lukluk long olketa naes samting long disfala earth bifor olketa man spoelem evri samting.

Mi lusim Germany, baem wanfala motorbike, and raedem motorbike hia for go long Africa. Bat no longtaem bihaen, mi mas go bak long Europe for repairim motorbike bilong mi. Then mi go long Portugal and taem mi sidaon long saedsea long there, mi disaed for no iusim motorbike for travel bat for travel long boat.

Mi meetim samfala young pipol wea redi for akrosim Atlantic Ocean long wanfala boat and mi go witim olketa. Wanfala long olketa hia hem Laurie, wea gogo mitufala marit. Firstaem, mifala sail go long olketa island long Caribbean. Then bihaen mifala stap lelebet taem long Puerto Rico, mifala go bak long Europe. Mitufala peim wanfala boat and laek for waka long hem mekem hem fit for mitufala stap long hem. Bat bihaen thrifala month, gavman bilong Germany talem mi for mas joinim navy.

Mi joinim navy for 15-fala month. Long datfala taem, mi and Laurie marit and mitufala redyim olketa samting for mitufala travel moa. Mitufala isisi waka long boat bilong mifala mekem hem fit for mifala sail raonem world and go lukim olketa naes samting. Bihaen mi finis long navy, bat bifor mifala finisim waka long boat, mitufala meetim Olketa Jehovah’s Witness and start for studyim Bible.

BIBLE CHANGEM LAEF BILONG MI:

Firstaem, mi tingse mi no need for changem staka samting long laef bilong mi. Mi maritim Laurie finis, and mi stop tu for smoke. (Ephesus 5:5) And mi tingse plan bilong mitufala for travel raonem world for lukim olketa spesol samting wea God wakem, hem gudfala samting for mifala duim.

Bat gogo mi luksavve mi mas changem olketa nogud wei bilong mi. Mi praod tumas and garem wei for independent, and mi tingse mi garem bigfala savve and mi savve duim eni samting nomoa. Mi tingim miseleva nomoa.

Wanfala taem, mi readim long Bible datfala Sermon bilong Jesus long Maunten. (Matthew, chapter 5-7) Firstaem mi no minim toktok bilong Jesus abaotem wei for hapi. Olsem example, hem sei man wea hangre and laek for drink hem hapi. (Matthew 5:6, ftn.) Mi no savve hao nao man olsem savve hapi. Taem mi gohed for study mi lanem hao evriwan needim God, bat miseleva mas hambol and luksavve mi tu needim God for helpem mi. Hem olsem wanem Jesus talem. Hem sei: “Olketa wea luksavve olketa needim God bae hapi.”—Matthew 5:3.

Mi and Laurie start for studyim Bible taem mitufala stap long Germany, then mifala muv go long France, and bihaen mifala go long Italy. Long olketa ples wea mifala go long hem, Olketa Jehovah’s Witness kam study witim mifala. Mi barava laekem wei wea olketa showimaot love and olketa wan mind. Mi luksavve olketa Witness evriwea long world olsem olketa brata and sista. (John 13:34, 35) Gogo, mi and Laurie baptaes and kamap Jehovah’s Witness.

Bihaen mi baptaes, mi gohed for changem wei bilong mi. Mi and Laurie disaed for sail followim coast long Africa, and then akrosim Atlantic Ocean for kasem United States. Taem mifala long datfala smol boat long open sea, mi luksavve mi man nating nomoa and mi barava tinghae long Creator wea wakem evri samting. Long datfala gogo, mitufala no garem staka samting for duim, so mi iusim taem bilong mi for readim Bible. Mi barava tinghae long wanem Bible talem abaotem laef bilong Jesus taem hem stap long earth. Hem wanfala perfect man wea garem bigfala savve, bat no enitaem hem mekhae long hemseleva. Hem mekhae long Dadi bilong hem and hem no tingim hemseleva.

Taem mi ting raonem example bilong Jesus, mi luksavve mi mas duim samting for Kingdom nao hem first samting long laef bilong mi and for no duim datwan nomoa taem hem fitim mi. (Matthew 6:33) So taem mi and Laurie kasem United States, mitufala disaed for stap long there and busy for worshipim Jehovah.

GUD SAMTING WEA MI KASEM:

Long bifor taem mi disaedem samting, mi depend long miseleva and mi no sure sapos disison bilong mi hem stret or nomoa. Bat distaem, mi depend long wisdom bilong Jehovah for helpem mi taem mi mas disaedem samting. (Isaiah 48:17, 18) And tu, mi savve long wanem nao best samting for mi duim long laef bilong mi, hem nao for mi worshipim God and helpem pipol for savve long hem.

From mi and Laurie followim olketa Bible principle, datwan helpem mitufala for stap gud tugeta. Gogo mitufala garem wanfala pikinini gele wea mifala trainim for savve long Jehovah and lovem hem.

Datwan no minim laef bilong mifala hem isi nomoa. Bat Jehovah helpem mifala, and mifala bae no givap and bae gohed for trustim hem.—Proverbs 3:5, 6.