Wanem Nao Iumi Savve Givim Long Jehovah?

JESUS sei: “Man wea givim samting hem barava hapi winim man wea kasem samting.” (Acts 20:35) Disfala principle hem fitim tu wei wea iumi fren witim Jehovah. Why nao olsem? Jehovah givim iumi staka present wea mekem iumi hapi, bat iumi savve barava hapi go moa taem iumi givim samting long Jehovah. Wanem nao iumi savve givim long Jehovah? Provebs 3:9 hem storyim hao iumi savve mekhae long Jehovah long wei wea iumi givim olketa gudfala samting long hem. Olketa gudfala samting hia, hem nao taem, savve, strong, and olketa material samting wea iumi garem. Taem iumi iusim olketa samting wea iumi garem for sapotim tru worship, iumi givim present long Jehovah, and taem iumi duim olsem, iumi bae barava hapi.

Wanem nao bae helpem iumi for tinghae long wei for iusim olketa material samting wea iumi garem for givim long Jehovah? Aposol Paul talem olketa Christian long Corinth for “keepim lelebet selen” for contribution. (1 Cor. 16:2) Wanem nao iu savve duim sapos iu laek for savve moa abaotem olketa difren wei for givim donation long ples wea iu stap? Plis lukim box long daon.

Long staka kantri, hem hard for man mekem online donation. Bat, information abaotem olketa nara wei for givim donation hem stap long web page for givim donation. Long samfala kantri, olketa garem article long datfala page wea ansarem olketa kwestin wea staka pipol askem abaotem donation.