Lane for Story Long Wei wea Helpem Pipol Barava Minim Samting
1. Wanem story long Bible nao bae iumi lukluk gud long hem and why nao olsem?
1 Tok bilong aposol Paul long wanfala synagogue long Antioch Pisidia long Acts 13:16-41, hem nambawan example long hao for story long wei for helpem pipol barava minim samting. Paul tingim history and tingting bilong pipol wea lisin long hem and hem changem story abaotem gud nius for fitim datwan. Taem iumi lukluk gud long disfala story, iumi laek for tingim hao nao iumi savve duim sem samting tu long ministry bilong iumi.
2. Wanem nao iumi lanem from wei wea Paul startim tok bilong hem?
2 Storyim Samting wea Pipol Savve and Agree Long Hem: Nomata message bilong Paul story abaotem important waka wea Jesus duim for fulfillim plan bilong God, Paul no startim tok bilong hem long wei for storyim datwan. Hem storyim history bilong Jew from datwan hem samting wea olketa evriwan savve and agree long hem. (Acts 13:16-22) Long sem wei tu, iumi savve pullim interest bilong pipol and kasem heart bilong olketa sapos iumi storyim samting wea pipol savve abaotem and acceptim. Maet diswan minim iumi mas askem olketa kwestin wea encouragem pipol for talem tingting bilong olketa and lisin gud mekem iumi luksavve wanem nao hem barava important long olketa.
3. Wanem nao mekem hem hard for olketa wea lisin long Paul acceptim hao Jesus nao hem Messiah wea God promisim?
3 Taem Paul storyim history bilong olketa Jew, hem remindim olketa wea lisin long hem abaotem promis bilong God for mekem wanfala man for sevem pipol kamap from laen bilong David. Bat, plande Jew weitim eni bigman bilong army for mekem olketa free from rul bilong Rome and mekem nation bilong olketa kamap hae winim eni nara nation. Olketa savve finis hao olketa leader bilong Jew religion long Jerusalem rejectim Jesus, and givim hem long olketa bigman bilong gavman bilong Rome wea killim hem dae. Hao nao Paul bae pruvim long olketa hao Jesus nao Messiah wea God promisim?
4. Hao nao Paul story long wei wea helpem olketa Jew for barava minim samting?
4 Changem Story: From Paul savve finis long tingting bilong olketa wea lisin long hem, hem iusim Word Bilong God for helpem olketa minim samting taem hem joinim datwan witim olketa samting wea olketa acceptim finis. Olsem example, hem storyim hao Jesus hem pikinini bilong David and hao John Baptaesa, wea evriwan ting long hem olsem wanfala profet bilong God, luksavve long Jesus tu. (Acts 13:23-25) Paul talem hao taem olketa leader bilong religion rejectim Jesus and judgem hem for dae, olketa “fulfillim olketa samting wea olketa Profet talem.” (Acts 13:26-28) And tu, hem explainim hao staka pipol lukim Jesus bihaen hem laef bak, and hem storyim olketa scripture wea olketa Jew wea lisin savve long hem and wea fulfill taem Jesus resurrect.—Acts 13:29-37.
5. (a) Hao nao Paul changem story bilong hem taem hem story witim olketa Greek? (b) Hao nao iumi savve followim example bilong Paul taem iumi witness long territory bilong iumi?
5 Long narasaed, taem hem story long olketa Greek long Areopagus, Athens, Paul iusim difren wei for story. (Acts 17:22-31) Nomata olsem, hem storyim datfala sem main message, and long tufala taem hia gud samting kamaot from datwan. (Acts 13:42, 43; 17:34) Distaem tu, iumi savve kasem heart bilong pipol witim gud nius sapos iumi storyim samting wea olketa wea lisin savve and acceptim, and sapos iumi changem story for fitim tingting and living bilong pipol.