Introduction

Organized to Do Jehovah’s Will, Page 4

Dear Olketa Servant Bilong God:

Disfala buk, Organized to Do Jehovah’s Will, olketa pablisim for Olketa Jehovah’s Witness. Hem storyim gud wanem samting bae mekem God hapi and mekem iumi for hapi for duim will bilong hem. Hem storyim hao Christian kongregeson hem organize for mekem waka bilong God gohed. Buk hia givim kaonsel and direction wea savve helpem iumi for gohed garem wan mind witim olketa brata bilong iumi evriwea long world. (1 Pet. 2:17; 5:9) Hem showim wei wea iumi savve tekpart for talemaot gud nius abaotem Kingdom for showimaot iumi luksavve long will bilong God for “evri difren kaen man . . . kasem stretfala savve abaotem truth.”—1 Tim. 2:4; Matt. 24:14.

Witim disfala wei wea iumi preachim gud nius abaotem Kingdom, iumi laek for givim tu spiritual help long olketa wea acceptim invitation for praisem Jehovah witim pipol bilong hem. (Ps. 145:21; Rev. 22:17) Olketa niu wan need for savve long hao nao organization bilong Jehovah duim waka bilong hem and lane hao nao for share long disfala preaching waka. Olketa kasem encouragement for gohed kasem olketa mark long Bible wea bae mekem olketa fit for kamap olketa Witness bilong Jehovah wea dedicate and baptaes.

Hem garem information abaotem olketa responsibility bilong olketa elder and olketa ministerial servant, wei for deal witim olketa judicial samting, and samfala nara samting abaotem hao kongregeson hem organize. Samfala taem tu, Wastaoa, Kingdom Ministry Bilong Iumi, and olketa nara pablikeson bilong Olketa Jehovah’s Witness storyim olketa nara information abaotem olketa samting hia.

Taem iufala followim evri samting wea stap insaed disfala pablikeson, mifala prea hao olketa samting hia bae helpem iufala for muv ahed long spiritual wei. So gohed hapi for duim will bilong Jehovah witim pipol bilong hem wea barava organize!

Governing Body Bilong Olketa Jehovah’s Witness