“Waswe, Mi Shud Muv Go Long Taon?”
1 Eniwan wea ting raonem idea for muv go long taon shud tingim samfala samting firstaem. Disfala pablikeson bilong UN Food and Agriculture Organization, Feeding the Cities, hem sei: “Wanfala main samting wea pullim pipol hem hao olketa tingse living bae moabeta long taon winim living wea olketa garem long vilij.” Bat, “maet living bilong olketa no kamap gud stretawe, and maet hem no kamap gud for staka year.”
2 For tok stret, plande pipol wea lusim olketa vilij for go stap long taon no faendem eni haos for stap insaed, no eni waka, and living hem kamap moa worse winim taem olketa stap long vilij. And tu, olketa faendem hem hard for getius long niu ples. So, sapos iu ting raonem idea for muv go long taon or long nara province, waswe, iu sure diswan bae helpem iu for sapotim famili bilong iu? Maet gogo, man win for faendem lelebet waka for selen, batawea, staka taem man tekem smol pei nomoa. Waswe, maet hevi wea iu kasem from iu mas waka staka hour just for kasem inaf selen fitim olketa need nomoa, mekem iu or famili bilong iu fail for duim samting wea iu savve hem moa important?—Matthew 28:19, 20; Hebrews 10:24, 25.
3 Samfala dadi chus for muv go long taon or nara province and lusim famili bilong olketa long hom. Waswe, diswan hem wise? Hem tru, olketa Christian dadi garem responsibility for provaedem olketa material need for famili bilong olketa, bat hao nao wei for lusim famili long hom for go lukaotem waka long nara ples bae affectim feeling and spiritual saed bilong famili? (1 Timothy 5:8) Waswe, bae olketa dadi fit for gohed trainim olketa pikinini bilong olketa “long discipline and wei for stretem tingting wea kam from Jehovah?” (Ephesians 6:4) Wei wea hasband and waef no stap tugeta savve mekem hem moa isi for tufala foldaon long temptation.—1 Corinthians 7:5.
4 Hem tru, wei for go stap long nara ples hem disison bilong man wanwan. Bat bifor olketa Christian mekem disison olsem, olketa shud ting raonem evri samting wea join witim diswan and prea long Jehovah for direction.—Luke 14:28.