Evriwan Savve Share for Mekem Olketa Niu Disaepol
1 For mekem wanfala disaepol, hem needim moa samting winim hard waka bilong man wea study witim hem. Jehovah savve iusim evri ‘wakman’ bilong hem for helpem wanfala Bible student kamap strong long spiritual wei. (1 Cor. 3:6-9) Iumi wanwan helpem olketa niu wan long wei for talem olketa koment from heart long olketa Christian meeting, and tu, long wei for showimaot gudfala fasin, wea diswan showimaot spirit bilong God hem muvim iumi. (John 13:35; Gal. 5:22, 23; Eph. 4:22, 23) Wanem nao nara samting wea iumi savve duim for helpem olketa niu wan?
2 Olsem Kongregeson: Iumi evriwan savve showimaot iumi interest long olketa wea start for kam long olketa meeting long wei for welkamim and story witim olketa bifor meeting start and bihaen taem meeting hem finis. Wanfala man ting go bak long firstaem wea hem go long wanfala meeting, and hem sei: “Long datfala meeting nao, namba bilong pipol wea showimaot trufala love wea mi no savve long olketa tu, hem barava moa big winim enitaem wea mi attendim church bilong mi start kam from taem mi pikinini yet. Mi savve diswan nao truth.” Sevenfala month bihaen hem go long first meeting bilong hem, hem baptaes.
3 Taem Bible student muv ahed long spiritual wei, praisem hem. Waswe, hem gohed strong and no givap nomata hem kasem persecution? Waswe, hem kam long olketa meeting evritaem? Waswe, hem givim koment nomata hem fraet tumas? Waswe, hem joinim Theocratic Ministry Skul or start for preach? Praisem hem for wei wea hem muv ahed. Diswan bae encouragem and strongim hem.—Prov. 25:11.
4 Olsem Bible Study Conductor: Wei wea samfala pablisa askem olketa nara pablisa for go witim olketa long Bible study hem helpem Bible student for savve long olketa narawan long kongregeson. No longtaem bihaen iu startim study, invaetem student for kam long olketa meeting. Taem hem start kam for long olketa meeting, tekem hem for meetim olketa narawan long kongregeson. Waswe, hem trae hard for winim wanfala nogud fasin olsem wei for smoke? Waswe, eniwan long famili bilong hem trae stopem hem for study? Hem bae kasem gud samting sapos hem story witim pablisa wea kasem olketa sem samting hia, bat wea gohed strong and nating givap.—1 Pet. 5:9.
5 Olketa niu wan needim kongregeson for sapotim olketa long spiritual wei. Evriwan savve helpem olketa for muv ahed long wei for showimaot olketa barava interest long olketa hia.