Praisem Jehovah Thru Long Wei for Duim Enitaem Witnessing
1 Olketa loyal servant bilong Jehovah lukaotem eni chance for praisem hem each day. (Ps. 96:2, 3; Heb. 13:15) Wanfala wei for duim datwan hem thru long enitaem witnessing. Plande worshiper bilong Jehovah distaem barava thankiu hao samwan hem showim Kingdom message long olketa thru long enitaem witnessing.
2 Wei for duim enitaem witnessing long wanfala man plande taem hem mekem wei for olketa narawan herem Kingdom message. Olsem example, wei wea Jesus story long datfala Samaritan woman long well bilong Jacob hem mekem chance kamap for plande moa pipol for interest long gud nius. (John 4:6-30, 39-42) Taem Paul and Silas stap insaed prison long Philippi, tufala witness long man wea lukaftarem olketa prisoner, and full famili bilong hem acceptim truth.—Acts 16:25-34.
3 Olketa Chance: Wanem chance nao iu savve garem for duim enitaem witnessing? Samfala duim taem olketa go long stoa, go long transport, or taem olketa weit for lukim doctor. Samfala narawan witness long taem bilong rest long waka or skul. Wei for putim wanfala Bible pablikeson long ples wea pipol savve lukim hem maet muvim pipol for ask abaotem samting wea iumi bilivim.—1 Pet. 3:15.
4 Hao for Start: Wanfala gele wea age bilong hem seven year and wea savve feel shame hem herem long meeting hao hem important for evriwan duim preaching waka. So taem hem go long stoa witim mami bilong hem, hem putim tufala brochure long basket bilong hem. Taem mami hem busy for peim olketa samting, gele hia hem offerim wanfala brochure long wanfala woman wea hapi for acceptim. Taem olketa askem hem wanem nao mekem hem no fraet for story long woman hia, gele hem ansa olsem: “Mi just sei, Redi, Set, Go! And then mi go duim nao!”
5 For duim enitaem witnessing, iumi need for garem tingting olsem datfala smol gele. Wanem nao bae helpem iumi? Prea for fasin for no fraet for tokaot. (1 Thess. 2:2) Redyim firstaem wanfala interesting kwestin or topic wea iu savve iusim for startim story. Then trustim hao Jehovah bae blessim hard waka bilong iu.—Luke 12:11, 12.
6 Wei for witness long pipol wea iumi meetim evriday hem mekem Jehovah kasem praise and mekem iumi hapi. Maet hem helpem samwan for followim road wea lead go long laef olowe.