Leta From Governing Body
Dear Olketa Witness Bilong Jehovah:
Mifala hapi for raet kam long iufala olketa brata! Mifala garem tingting wea semsem olsem aposol John, wea hem sei hao hem ‘barava lovem’ olketa brata bilong hem and hem hapi bikos olketa “gohed for followim trufala wei.” (2 John 1, 4) Hem barava nambawan for iumi savve long trufala wei, iaman! Trufala samting wea iumi lanem helpem iumi for lusim olketa laea teaching and olketa kastom biliv bilong Bigfala Babylon wea no showim respect long God. Wei for obeyim wanem iumi lanem helpem iumi for kamap pipol wea sorre long narawan and kaen long olketa. And wanem iumi lanem hem mekem iumi for fren gud witim God and for garem hope for laef olowe.
Tru nao, iumi barava tinghae long holy spirit bilong Jehovah wea evritaem leadim and strongim iumi! Mifala savve hao iufala hapi for ting raonem olketa tok, interview, and demonstration wea kamap long 2008 “Holy Spirit Leadim Iumi” Distrik Convention. From evri samting long disfala world kamap nogud tumas, hem important for iumi mas trustim holy spirit bilong Jehovah for leadim iumi long olketa hardfala taem wea bae kasem iumi.
Mifala savve iufala hapi for readim olketa naesfala story insaed Yearbook abaotem olketa brata and sista wea nating givap long faith bilong olketa nomata olketa safa. And hem spesol for tingim hao olketa wea baptaes no longtaem go nomoa or wea no baptaes yet, olketa faithful nomata olketa kasem barava hard taem. From olketa faithful and gohed strong for duim stret samting, mifala lovem olketa! Tru nao, nambawan fasin bilong olketa savve strongim iumi for gohed faithful long Kingdom nomata iumi kasem hard taem.—1 Thess. 1:6-8.
Olketa brata and sista bilong mifala, mifala savve hao iufala kasem hard taem saed long selen and nara samting wea iufala mas feisim mekem famili bilong iufala stap gud. Samfala long iufala, iufala faendem hem hard for sapotim Kingdom waka and for evritaem faithful long olketa nara waka long kongregeson. Bihaen mifala prea abaotem, mifala disaed for mekem samfala change saed long kongregeson meeting wea hem start long January 1, 2009. From disfala niu change wea kamap mifala laekem iufala for iusim taem wea iufala garem for duim study seleva and famili study.
Mifala barava hapi for lukim staka wea baptaes long olketa assembly and convention last year. Staka long olketa hem olketa young wan. Iufala olketa mami and dadi fit for kasem praise from wei wea iufala lanem olketa pikinini bilong iufala for tinghae long wanem Bible talem and for strongim olketa for dedicate and worshipim Jehovah. Nomata olketa young wan hia kasem hard taem long skul, olketa kasem mark for baptaes, diswan showimaot gudfala training wea olketa kasem long haos.—Ps. 128:1-6.
Iumi hapi tumas from iumi garem staka Bible study wea showimaot iumi waka hard and olketa missionary and olketa spesol pioneer tu duim bigfala waka. Mifala long Governing Body barava tinghae long bigfala waka wea iufala olketa brata and sista duim taem iufala sei “Kam!” long olketa wea laek for lane and “tekem wata bilong laef free.” (Rev. 22:17) Mifala barava hapi for welkamim 289,678 wea showimaot olketa dedicate finis and baptaes long 2008 service year!
Hem gud for iumi evritaem tingim toktok wea aposol John talem: “World and evri samting wea pipol long world laekem hem gogo for finis, bat man wea duim wanem God laekem bae stap for olowe.” (1 John 2:17) And for no forgetim hao klosap nao disfala nogud world bae finis! Hem gud tumas for iumi duim wanem God laekem olsem main samting long laef bilong iumi and “gohed for lukaot.” (Matt. 24:42) Sapos iumi duim olsem bae iumi nating sorre bihaen, and bae iumi kasem olketa gudfala samting from wei wea Jehovah hem kaen tumas.—Isa. 63:7.
Mifala savve hao olketa gudfala report long staka kantri wea stap long disfala Yearbook baebae strongim iufala evriwan for gohed aftarem Kingdom firstaem. Mifala laek for letem iufala savve hao mifala evritaem tingim iufala and prea for iufala, and mifala barava lovem iufala evriwan. Mifala savve Jehovah bae barava blessim iufala.
Olketa brata bilong iufala,
Governing Body bilong Olketa Jehovah’s Witness