Teachim Pikinini Bilong Iu for Praisem Jehovah
1. Waswe, olketa young wan savve praisem Jehovah?
1 Psalm 148:12, 13 encouragem olketa boy and gele for “praisem nem bilong Jehovah.” Bible storyim staka example bilong olketa young wan wea duim datwan. Olsem example, Samuel servem Jehovah taem hem smol boy.” (1 Sam. 2:18) Wanfala “smol gele” nao story long waef bilong Naaman hao profet bilong Jehovah long Israel savve healim leprosy bilong Naaman. (2 Ki. 5:1-3) Taem Jesus go insaed long temple and duim olketa mirakol, “olketa boy” nao singaot olsem: “Mifala prea, plis sevem Son bilong David!” (Matt. 21:15) Hao nao olketa mami and dadi savve teachim pikinini bilong olketa for praisem Jehovah?
2. Why nao hem important for mami and dadi showimaot gudfala example long pikinini bilong olketa?
2 Showimaot Example: Jehovah komandim olketa dadi long Israel for lovem hem and for putim olketa komandment bilong hem insaed long heart bilong olketa seleva firstaem bifor olketa savve strongim truth insaed heart bilong pikinini bilong olketa. (Deut. 6:5-9) Sapos iu storyim olketa gud samting abaotem ministry and garem schedule for duim ministry evri week, olketa pikinini bae ting long ministry olsem hem important and wea mekem man hapi.
3. Wanem gud samting nao wanfala sista kasem from example bilong mami and dadi bilong hem?
3 Wanfala sista hem hapi taem hem ting go bak and sei: “Taem mi pikinini, famili bilong mi garem schedule for share long field ministry evri weekend. Mi lukim hao mami and dadi bilong mi barava enjoyim waka for preach. Long laef bilong mifala, mifala ting long ministry hem samting wea mekem mifala hapi.” Disfala sista hem anbaptaes pablisa taem hem seven year and hem duim full-taem service for winim 32 year.
4. Wanem nao hem minim for gohed trainim olketa pikinini?
4 Gohed for Trainim Pikinini: Taem iu duim ministry, encouragem pikinini bilong iu for tekpart. Maet olketa savve noknok long door, givim tract long haosholder, or readim wanfala scripture. Diswan bae mekem olketa hapi and helpem olketa for no fraet for preachim message abaotem Kingdom. Taem olketa big, olketa shud duim moa samting long ministry. So helpem olketa for gohed gud and for ting raonem olketa goal wea bae helpem olketa long ministry.
5. Wanem nao wanfala pikinini need for duim mekem hem fit for kamap anbaptaes pablisa?
5 Story witim olketa elder taem iu luksavve pikinini bilong iu fit for kamap anbaptaes pablisa and taem pikinini talem hem laek for duim datwan. Wei for kamap pablisa bae mekem olketa ting strong long wei wea olketa seleva garem responsibility for praisem Jehovah. Tingim, bifor wanfala pikinini fit for kamap anbaptaes pablisa, hem no need for savve long staka samting olsem bigman wea baptaes finis. Waswe, pikinini bilong iu minim olketa main teaching long Bible? Waswe, hem followim wanem Bible talem? Waswe, hem laek for share long ministry and for pipol savve long hem hao hem wanfala Jehovah’s Witness? Sapos olsem, olketa elder maet disaedem hem fit for kamap anbaptaes pablisa.—Lukim Organized to Do Jehovah’s Will, pp. 79-82.
6. Why nao hem gud for mami and dadi trainim pikinini bilong olketa?
6 Mami and dadi need for waka hard for teachim pikinini for disaed seleva for praisem Jehovah. Mami and dadi savve barava hapi for lukim pikinini gohed gud long spiritual wei. Jehovah nao barava hapi taem olketa pikinini story abaotem olketa nambawan samting wea hem duim.