Hao for Kasem Olketa Spiritual Goal Bilong Iu
1. Staka young Christian garem olketa wanem spiritual goal?
1 From iu wanfala young Christian wea lovem Jehovah, disfala toktok bilong Jesus bae affectim olketa goal bilong iu taem hem sei: “Evritaem kingdom . . . mas first samting long laef bilong iufala.” (Matt. 6:33) Maet iu garem goal for duim moa samting long ministry olsem for kamap pioneer or for muv go long nara ples wea no garem inaf pablisa for preach abaotem Kingdom. Maet samfala garem goal for duim construction waka long nara kantri, for waka long Bethel, or duim missionary waka. Olketa goal hia hem nambawan and mekem man hapi!
2. Wanem nao savve helpem iu for kasem olketa spiritual goal bilong iu?
2 Wanfala samting wea savve helpem iu for kasem olketa spiritual goal bilong iu hem for raetem long pepa. Wastaoa bilong July 15, 2004, hem sei: ‘Wanfala idea savve kamap moa klia taem iu raetem long pepa. Maet iu laek for raetem olketa goal bilong iu long pepa and hao for kasem datwan.’ And tu, olketa nara smol goal wea iu markem bae helpem iu for isisi kasem main goal bilong iu long future and for gohed tingim datwan.
3. Talem samfala smol goal wea man savve kasem kwiktaem wea bae helpem hem fit for baptaes.
3 Olketa Smol Goal wea Iu Savve Kasem Kwiktaem: Sapos iu no baptaes yet, ting raonem wanem iu need for duim mekem iu kasem datfala goal. Maet iu need for savve gud long olketa main teaching long Bible. Sapos olsem, markem goal for studyim gud Wanem Bible Teachim buk, and readim evri scripture. (1 Tim. 4:15) Markem goal tu for readim full Bible from Genesis kasem Revelation, olsem olketa Bethelite and olketa student long Gilead mas duim. Bihaen iu duim datwan, gohed readim Bible evriday. (Ps. 1:2, 3) Tingim, datwan bae barava helpem iu for kamap gud long spiritual wei! Bifor iu readim Bible and duim study, prea long Jehovah, and evritaem trae for followim wanem iu lanem.—Jas. 1:25.
4. Olketa wanem smol goal nao olketa wea laek waka long Bethel or laek pioneer savve markem?
4 Sapos iu baptaes finis, wanem moa samfala goal wea iu savve kasem? Waswe, iu need for duim moa samting for kamap gud long hao for preach? Waswe, iu mekem hem wei bilong iu for traem best for kamap gud long wei for iusim Bible long field ministry? (2 Tim. 2:15) Hao nao iu savve duim moa samting long ministry? Markem olketa smol goal wea iu savve kasem kwiktaem wea fitim age and living bilong iu, and wea bae helpem iu for kasem olketa nara goal moa.
5. Hao nao wei for markem olketa smol goal helpem wanfala brata for kasem goal for waka long Bethel?
5 Young Wan wea Kasem Goal Bilong Hem: Taem Tony wea 19 year visitim wanfala branch office bilong Olketa Jehovah’s Witness, samting wea hem lukim mekem hem laekem tumas for waka long Bethel. Bat laef bilong hem bifor hem no mas gud, and hem no dedicate yet long God. Tony disaed hem laek for mekem Jehovah hapi and hem markem goal for kamap fit for baptaes. Bihaen hem kasem datfala goal, hem markem samfala nara goal, for auxiliary pioneer and then regular pioneer. Hem markem long kalenda date wea hem laek for start. Tingim hapi wea Tony kasem taem hem kasem invitation for waka long Bethel bihaen hem pioneer for samfala year!
6. Wanem nao savve helpem iu for kasem olketa spiritual goal bilong iu?
6 Iu tu savve kasem olketa spiritual goal bilong iu taem iu mekem Kingdom waka main samting long laef bilong iu. Talem ‘evri plan bilong iu’ long Jehovah long prea and waka hard for kasem.—Prov. 16:3; 21:5.