Waswe, Famili Bilong Iu Redi for Stap Laef?
1 Olketa profesi long Bible wea kamap tru barava showimaot hao klosap nao disfala rabis world bae finis. Iumi stap long barava nogud taem wea klosap semsem olsem datfala taem bilong Flood long taem bilong Noah. (Matt. 24:37-39) Taem datfala rabis world hem finis, Noah hem stap laef bikos hem “wakabaot witim trufala God.” (Gen. 6:9) Masbi Noah lanem famili bilong hem abaotem wanem Jehovah laekem, bikos olketa tu stap laef long taem bilong datfala Flood. Hao nao iumi savve followim wanem Noah duim and redyim famili bilong iumi for stap laef taem disfala rabis world hem finis?
2 Preach Abaotem Samting wea Raeteous: Noah gohed strong for samting olsem 40 go kasem 50 year for “preach abaotem samting wea raeteous.” (2 Pet. 2:5) Masbi olketa pipol long taem bilong Noah tok spoelem preaching waka wea hem duim, maet from olketa stap anda long paoa bilong olketa bighed angel. Staka taem iumi meetim pipol wea no laek herem iumi and tok spoelem preaching waka wea iumi duim, diswan showimaot hao disfala rabis world klosap for finis. (2 Pet. 3:3, 4) Pipol long taem bilong Noah no laek for herem hem, bat staka pipol distaem hapi for herem iumi and kam for worshipim Jehovah. (Isa. 2:2) Sapos iumi gohed strong, ‘iumi and olketa wea lisin long iumi bae kasem laef.’ (1 Tim. 4:16) Samting wea mami and dadi talem and wanem tufala duim savve lanem pikinini for tingim hao preachim waka hem barava important!—2 Tim. 4:2.
3 Hem Duim “Evri Samting”: Noah and famili bilong hem stap laef, bikos olketa barava followim toktok bilong Jehovah. (Gen. 6:22) Distaem tu hem important for iumi mas ‘willing for obeyim’ wanem Bible and datfala faithful slave talem. (Jas. 3:17) Wanfala dadi hem obeyim wanem organization bilong Jehovah talem. Olsem example, hem duim famili study evri week and hem tekem famili long preaching waka evri Saturday or Sunday. Evri week hem trae for waka witim wanfala pikinini long famili long preaching waka. Wei wea hem gohed strong for duim “evri samting,” datwan helpem sixfala pikinini bilong hem for kamap olketa faithful wakaman bilong Jehovah.
4 Disfala rabis world bae seknomoa hem finis. (Luke 12:40) Taem iumi followim wanem Noah duim and showimaot faith, iumi and famili bilong iumi bae redi for stap laef!—Heb. 11:7.