Gohed Lane From Jehovah!
1. Wanem nao Jehovah laekem iumi for gohed duim?
1 Jehovah, “Nambawan Teacher” bilong iumi laekem iumi for gohed lane from hem. (Isa. 30:20) Bihaen hem creatim Jesus, Jehovah start nao for teachim hem. (John 8:28) And nomata Adam hem bighed, Jehovah gohed for teachim olketa man wea no perfect.—Isa. 48:17, 18; 2 Tim. 3:14, 15.
2. Wanem kaen teaching program nao gohed distaem?
2 Distaem, Jehovah leadim nambawan teaching program wea winim enitaem bifor long history. Olsem Isaiah profesi abaotem, staka million pipol raon long world olketa go long “maunten bilong haos bilong Jehovah.” (Isa. 2:2) Why nao iumi shud go long maunten bilong haos bilong Jehovah? Iumi go for Jehovah hem lanem iumi! (Isa. 2:3) Long 2010 service year, Olketa Jehovah’s Witness iusim winim 1.6 billion hour for preach and teachim pipol tru samting long Bible. Evri week winim 105,000 kongregeson bilong Olketa Jehovah’s Witness evriwea long world kasem spiritual training. And tu, datfala wakaman wea faithful and wise redyim olketa buk long winim 500 difren languis for teachim pipol.
3. Hao nao iuseleva kasem gud samting from education wea kam from Jehovah?
3 Kasem Gud Samting: Iumi barava kasem gud samting from education wea kam from God! Iumi lanem hao God hem garem nem and hem tingim iumi. (Ps. 83:18; 1 Pet. 5:6, 7) Iumi savve long ansa bilong samfala important kwestin olsem: Why nao pipol safa and dae? Hao nao mi savve barava hapi? Why nao iumi laef? Jehovah teachim iumi tu for savve long stretfala wei mekem iumi “garem gudfala laef.”—Josh. 1:8.
4. Wanem nao samfala training wea pipol bilong God savve kasem, and why nao iumi shud gohed lane from Jehovah?
4 Nara samting wea Jehovah givim hem olketa spesol training for helpem pipol bilong hem for duim samfala waka moa for hem. Long page 4 kasem 6, hem storyim samfala training wea samfala savve kasem. Nomata living bilong iumi maet mekem iumi no fit for kasem olketa training hia, waswe, iumi tinghae long eni training wea iumi savve kasem from Jehovah? Waswe, iumi evritaem encouragem olketa young wan for markem olketa spiritual goal and kasem nambawan training from Jehovah, or olketa teacher long skul and olketa narawan pullim olketa for aftarem hae education long disfala world? Taem iumi gohed lane from Jehovah datwan bae helpem iumi for garem gudfala laef distaem and laef olowe long future.—Ps. 119:105; John 17:3.
Training wea Iu Savve Kasem From Organization Bilong Jehovah
Read and Raet Class
• For Wanem: Hem for teachim pipol hao for read and raet mekem datwan helpem olketa for duim study seleva and for teachim pipol tru samting wea stap long Bible.
• Hao Long: Fitim need bilong olketa.
• Long wea: Long Kingdom Hall.
• Hu Nao Savve Attend: Olketa pablisa and olketa wea interest.
• Hao for Apply: Olketa elder long kongregeson nao arrangem disfala class for fitim need wea stap, and olketa elder encouragem eniwan wea bae kasem gud samting from datwan for attend.
Theocratic Ministry Skul
• For Wanem: For redyim olketa pablisa for kamap fit for teachim gud nius long narawan.
• Hao Long: Evri week.
• Long wea: Long Kingdom Hall.
• Hu Nao Savve Joinim: Evri pablisa. And tu, olketa wea evritaem kam long meeting and agree witim olketa teaching long Bible and live followim olketa Christian principle.
• Hao for Apply: Story witim Theocratic Ministry Skul overseer.
Skul for Lanem Nara Languis
• For Wanem: Hem for lanem olketa pablisa long hao for talemaot gud nius long nara languis.
• Hao Long: Foa or faevfala month. Samfala taem olketa garem diswan long evri Saturday morning for wan or tufala hour.
• Long wea: Staka taem hem long Kingdom Hall.
• Hu Nao Savve Joinim: Olketa pablisa wea showimaot gudfala example and wea laek for preach long nara languis.
• Hao for Apply: Branch office nao arrangem disfala class for fitim need bilong territory.
Kingdom Hall Construction
• For Wanem: For wakem and fixim olketa Kingdom Hall. Diswan hem no wanfala skul, bat hem wanfala wei wea olketa volunteer lane hao for duim samfala difren waka, mekem olketa savve help for wakem and fixim olketa Kingdom Hall.
• Hao Long: Depend long taem wea volunteer hem markem.
• Long wea: Eniwea long Solomon Islands. Samfala volunteer maet go for help long relief waka long eni ples wea kasem disaster.
• Hu Nao Fit: Olketa brata and sista wea baptaes finis wea olketa elder appruvim. Olketa no need for savve long building waka.
• Hao for Apply: Eniwan wea interest savve tekem disfala form, Application for Kingdom Hall Construction Volunteer Program (A-25-SP) from olketa elder.
Pioneer Service Skul
• For Wanem: Hem for helpem olketa pioneer for ‘barava duim gud ministry’ bilong olketa.—2 Tim. 4:5.
• Hao Long: For tufala week.
• Long wea: Branch office savve markem, staka taem hem long Kingdom Hall.
• Hu Nao Fit: Olketa wea duim regular pioneer for winim wanfala year finis.
• Hao Nao for Joinim: Circuit overseer nao bae raetem leta for olketa wea pioneer for winim wanfala year finis.
Skul for Olketa Niu Bethelite
• For Wanem: Hem for helpem olketa niu wan wea kam long Bethel for duim gud waka bilong olketa long Bethel.
• Hao Long: Wanfala hour evri week for sixtin week.
• Long wea: Long Bethel.
• Hu Nao Fit: Olketa permanent Bethelite, or olketa temporary volunteer wea stap long Bethel for winim wanfala year finis.
• Hao Nao for Joinim: Olketa wea waka long Bethel wea fit bae attend.
Kingdom Ministry Skul
• For Wanem: Hem for trainim olketa elder and ministerial servant for duim gud waka wea olketa garem long kongregeson. (Acts 20:28) Governing Body nao arrangem disfala skul for kamap evri tu-thri year.
• Hao Long: For olketa elder, disfala skul hem for wan and haf day, and for olketa ministerial servant hem for wanfala full day.
• Long wea: Staka taem hem long Kingdom Hall or Assembly Hall.
• Hu Nao Fit: Hem for olketa elder or ministerial servant nomoa.
• Hao Nao for Joinim: Circuit overseer nao bae raetem leta for olketa elder and ministerial servant.
Skul for Olketa Elder*
• For Wanem: Hem for helpem olketa elder for duim gud waka bilong olketa long kongregeson.
• Hao Long: Hem for faevfala day.
• Long wea: Branch office savve markem, staka taem hem long Kingdom Hall or Assembly Hall.
• Hu Nao Fit: Olketa elder nomoa.
• Hao Nao for Joinim: Branch office nao bae raetem leta for olketa elder.
Skul for Traveling Overseer and Waef*
• For Wanem: Hem for helpem olketa circuit and distrik overseer for kamap gud long waka bilong olketa for lukaftarem kongregeson and for “waka hard for storyim and teachim toktok bilong God” and for lukaftarem olketa sheepsheep bilong God.—1 Tim. 5:17; 1 Pet. 5:2, 3.
• Hao Long: Hem for tufala month.
• Long wea: Branch office nao savve markem.
• Hu Nao Fit: Olketa circuit or distrik overseer nomoa.
• Hao Nao for Joinim: Branch office nao bae raetem leta for olketa traveling overseer and waef bilong olketa.
Bible Skul for Olketa Singol Brata*
• For Wanem: Hem for redyim olketa elder and ministerial servant wea no marit for duim samfala waka moa. Klosap evriwan wea attend savve kasem assignment for stap long kantri bilong olketa nomoa and go long ples wea garem need. Maet tu-thri savve kasem assignment for go long nara kantri.
• Hao Long: Hem for tufala month.
• Long wea: Branch office savve markem, staka taem hem long Kingdom Hall or Assembly Hall.
• Hu Nao Fit: Olketa singol brata wea age bilong olketa hem midolwan long 23 and 62 year wea garem gudfala health. Olketa hia shud laek for helpem olketa brata and sista and for talemaot gud nius long ples wea garem need. (Mark 10:29, 30) Olketa mas elder or ministerial servant for winim tufala year firstaem.
• Hao for Apply: Sapos disfala skul hem kamap long kantri bilong iu, olketa wea interest savve go long wanfala meeting wea bae kamap long taem bilong circuit assembly. Long datfala meeting olketa bae herem moa samfala samting abaotem diswan.
Bible Skul for Olketa Hasband and Waef*
• For Wanem: Hem for olketa kasem spesol training, mekem Jehovah savve iusim olketa long bigfala wei moa insaed organization bilong hem. Klosap evriwan wea attend savve kasem assignment for stap long kantri bilong olketa nomoa and go long ples wea garem need. Maet tu-thri savve kasem assignment for go long nara kantri.
• Hao Long: Hem for tufala month.
• Long wea: Distaem, samfala class gohed long Watchtower Educational Center long Patterson, New York, U.S.A. Bihaen, branch office savve markem olketa ples for garem disfala skul, long Assembly Hall or wanfala Kingdom Hall.
• Hu Nao Fit: Olketa hasband and waef wea age bilong tufala hem midolwan long 25 and 50 year wea garem gudfala health. Olketa hia shud fit for go long ples wea garem need and garem disfala tingting: “Mi long hia! Sendem mi.” (Isa. 6:8) And tufala shud marit for winim tufala year finis and duim full-taem service for winim tufala year.
• Hao for Apply: Sapos disfala skul hem kamap long kantri bilong iu, olketa wea interest savve go long wanfala meeting wea bae kamap long taem bilong spesol assembly day. Long datfala meeting olketa bae herem moa samfala samting abaotem diswan.
Watchtower Bible Skul Bilong Gilead
• For Wanem: Hem for trainim olketa pioneer and olketa narawan wea duim full-taem service for duim missionary waka.
• Hao Long: Hem for faevfala month.
• Long wea: Long Watchtower Educational Center, Patterson, New York, U.S.A.
• Hu Nao Fit: Olketa hasband and waef wea baptaes for thrifala year finis, and wea givim firstfala application bilong tufala, taem age bilong tufala hem midolwan 21 and 38 year. Tufala mas savve long English languis, mas marit for winim tufala year, mas duim full-taem service distaem for winim tufala year nao, and mas garem gudfala health. Olketa wea pioneer long nara kantri (and olketa missionary wea no go long Gilead insaed diswan tu); olketa traveling overseer and olketa Bethelite savve apply. And tu, olketa wea attendim Ministerial Training Skul, Bible Skul for Olketa Singol Brata, and Bible Skul for Olketa Hasband and Waef savve apply.
• Hao for Apply: Long samfala kantri, wanfala meeting savve kamap long taem bilong distrik convention for olketa wea interest for go long disfala skul. Long datfala meeting olketa bae herem moa samfala samting abaotem diswan. Sapos no eni meeting kamap long distrik convention, then iu maet raet long branch office bilong iu for savve long samfala samting moa.
Skul for Brata Long Branch Komiti and Waef
• For Wanem: Hem for helpem olketa brata long Branch Komiti for duim gud waka for lukaftarem olketa Bethel hom, for lukaftarem preaching waka, and lukaftarem waka wea gohed long olketa difren circuit and distrik. And for lukaftarem tu waka long transleison, printing, shipping department, and olketa nara department long Bethel.—Luke 12:48b.
• Hao Long: Hem for tufala month.
• Long wea: Long Watchtower Educational Center, Patterson, New York, U.S.A.
• Hu Nao Fit: Olketa brata long Branch Komiti or Kantri Komiti or olketa brata wea bae kamap Komiti member.
• Hao for Apply: Governing Body nao bae raetem leta for olketa brata hia and waef bilong olketa.
[Olketa Footnote]
*Distaem, disfala skul hem kamap long samfala kantri nomoa.