Tinghae Long Privilege for Preachim Kingdom Evri Month!

Hem wanfala privilege for preachim gud nius abaotem Kingdom long nara pipol. So fitim for iumi tinghae long privilege hia. Disfala waka mekem Jehovah hapi and helpem pipol wea garem honest heart for kasem laef. (Prov. 27:11; 1 Tim. 4:16) Iumi bae savve gud hao for duim ministry sapos iumi duim datwan evritaem wea datwan bae mekem iumi hapi.

Givim Report: Samfala wea duim preaching waka no kwiktaem for givim report bilong olketa long end long month. Iumi mas no tingse waka wea iumi duim hem smol tumas for reportim. (Comparem Mark 12:41-44.) Bihaen long preaching, hem gud for raetem haomas hour iumi duim long kalenda or wanfala buk. Wei for duim olsem savve mekem hem isi for iumi givim stretfala report long end long month.

Givim Help Olketa Needim: Maet kongregeson need for garem olketa arrangement wea bae helpem olketa pablisa for share evri month long ministry. Kongregeson secretary and olketa field service grup overseer savve arrange for samfala strong pablisa helpem olketa hia. Sapos iu garem pikinini or Bible student wea pablisa bat no baptaes, teachim olketa for reportim waka wea olketa duim evri month.