Young Pipol wea Shaen Olsem Laet
1. Hao nao Bible hem showimaot olketa Christian bae difren, and hao nao toktok hia fitim olketa young Christian distaem?
1 Jesus talem olketa disaepol bilong hem: “Iufala nao laet bilong world.” (Matt. 5:14, 16) Pipol savve lukim wei wea olketa difren, olsem wanfala taon wea stap antap long hill wea luk braet taem sun shaen long hem. Distaem plande young Christian “shaen olsem laet insaed long disfala world” long wei wea olketa duim stret samting and olketa strong for preach.—Phil. 2:15; Mal. 3:18.
2. Wanem nao samfala wei wea iu savve preach long olketa teacher and olketa skulfren?
2 Long Skul: Wanem nao iu savve duim mekem iu preach long skul? Samfala young wan mekius long chance wea class story raonem olketa subject olsem olketa drug, evolution, and war. Wanfala sista kasem skul assignment for raet abaotem terrorism, so hem iusim datfala chance for talem hao Kingdom bilong God nao hem hope for olketa man. Datfala teacher hem tinghae long wei wea sista hia barava redyim gud report bilong hem, and diswan mekem wei for datfala sista for witness moa long teacher.
3. Hao nao wei bilong iu long skul savve helpem iu for shaen olsem laet?
3 Narafala wei for shaen olsem laet hem taem iu showimaot gudfala wei, and lukluk and kaleko bilong iu showimaot respect. (1 Cor. 4:9; 1 Tim. 2:9) Taem olketa student and teacher lukim hao wei and lukluk bilong iu hem difren, maet diswan mekem samfala for interest long truth and diswan savve givim iu chance for storyim olketa tru samting wea stap insaed Bible. (1 Pet. 2:12; 3:1, 2) Maet hem no isi for showimaot gudfala wei, bat Jehovah bae barava blessim iu. (1 Pet. 3:16, 17; 4:14) For mekem man interest long gud nius, maet iu savve readim Bible literature taem iu spel, or leavim literature long ples wea narawan savve lukim.
4. Wanem nao samfala gud samting wea kamaot from wei for preach long skul?
4 Taem iu shaen olsem laet long skul datwan savve strongim faith bilong iu, and bae iu hapi for servem Jehovah. (Jer. 9:24) And tu, datwan bae protectim iu. Wanfala sista hem sei: “Wanfala gud samting wea kamaot from wei wea mi storyim biliv bilong mi hem hao olketa student no trae for pullim mi for duim olketa samting wea Bible sei hem no stret.”
5. (a) Hao nao samfala young wan duim moa samting long ministry? (b) Wanem nao olketa spiritual goal bilong iu?
5 Duim Moa Samting: Narafala wei wea staka young wan shaen olsem laet hem long wei for duim moa samting long ministry. Bihaen wanfala brata finisim hae skul, hem muv go long ples wea garem bigfala need for olketa Kingdom pablisa. Hem serve long wanfala smol kongregeson wea garem wanfala elder nomoa. Hem raet go long wanfala fren and hem sei: “Mi barava hapi for stap long hia. Ministry long hia hem barava naes tumas! Mifala savve story witim pipol for samting olsem 20 minute long evri haos, from olketa laek herem evri samting wea mifala storyim. Bae hem gud tumas sapos evri young wan duim samting olsem and hapi olsem mi. No eni samting hem winim wei for iusim evri samting iumi garem for servem Jehovah.”
6. Wanem nao mekem iu tinghae long olketa young wan long kongregeson bilong iu?
6 Mifala barava tinghae long iufala olketa young wan wea shaen olsem laet insaed long disfala world! (1 Thess. 2:20) Taem iu gohed for servem Jehovah witim full heart, soul, mind, and strong bilong iu, iu bae kasem “staka samting distaem . . . and long world wea bae kam, bae [iu] kasem laef olowe.”—Mark 10:29, 30; 12:30.