Kwestin Box
◼ Waswe, hem fitim for reportim famili Bible study?
Sapos dadi and mami duim famili Bible study witim olketa pikinini wea no baptaes yet, tufala savve reportim wan hour nomoa evri week. Dadi nao bae reportim wan return visit evri week, and wanfala Bible study evri month. Dadi and mami savve duim olsem nomata sapos iufala duim study witim olketa pikinini winim wan hour, or study tu-thri taem long week, or iufala study witim each pikinini long difren taem.—Lukim English Organized buk, p. 86-87.
Sapos evriwan insaed famili olketa baptaes finis, then dadi and mami shud no reportim hour or datfala study (bat iu savve reportim hour and study sapos pikinini studyim yet mek-tu buk bihaen hem baptaes). Diswan hem bikos kongregeson field service report shud showimaot wanem iumi duim long preaching waka and long waka for teachim Bible long pipol wea no dedicate and baptaes yet. (Matt. 24:14; 28:19, 20) Nomata maet iu no savve reportim hour or Bible study for famili study, hem important for duim datwan evritaem.
Hem responsibility bilong olketa Christian dadi and mami for study witim pikinini bilong olketa. Dadi and mami wea needim help for startim or for duim gud famili study bilong olketa savve askem olketa elder for helpem olketa. Sapos samting happen wea mekem hem hard for dadi and mami study witim pikinini wea no baptaes, and maet nara pablisa nao need for study witim datfala pikinini, then olketa mas go storyim diswan witim chairman bilong olketa elder or service overseer. Sapos olketa elder appruvim diswan, pablisa wea duim disfala study savve reportim study hia olsem hem reportim eni nara Bible study bilong hem.
Mami and dadi need for iusim staka taem and strong bilong olketa for trainim pikinini for followim olketa wei bilong Jehovah winim datfala wan hour wea olketa savve reportim. (Deut. 6:6-9; Prov. 22:6) Iufala dadi and mami fit for kasem praise for wei wea iufala duim bigfala waka for “lukaftarem olketa [pikinini] gud long wei for stretem and trainim olketa followim samting wea Jehovah talem.”—Eph. 6:4.