“Waswe, Mi Shud Muv Go Long Taon?”

Sapos iu laek for muv go long taon, hem gud for ting raonem samfala samting firstaem. Wanfala buk bilong UN Food and Agriculture Organization, Feeding the Cities, hem sei: “Wanfala main samting wea mekem pipol for laek muv go long taon, hem from olketa tingse laef long taon bae hem gud winim laef bilong olketa long vilij.” Bat datfala buk gohed for sei: “Maet for samfala pipol laef bilong olketa no change stretawe, maet nara genereson bilong olketa nao bae kasem gud samting from datwan.”

Plande pipol wea lusim vilij for go stap long taon faendem hard for getius long niu ples, olketa no savve faendem ples for stap, hem no isi for olketa kasem waka for selen, and laef bilong olketa barava hard winim bifor. So, sapos iu laek for muv go long taon, waswe, iu sure bae iu savve sapotim famili bilong iu? Staka taem hem no isi for faendem waka long taon, and sapos gogo man faendem eni waka hem savve kasem smol pei nomoa. Sapos iu mas waka for staka hour mekem iu kasem inaf selen, maet datwan mekem iu or famili bilong iu for no savve duim olketa spiritual samting.—Matthew 28:19, 20; Hebrew 10:24, 25.

Samfala parents disaed for muv go long taon and lusim olketa pikinini long vilij. Waswe, diswan hem wise samting for duim? Olketa Christian parents garem responsibility for provaedem olketa material samting wea famili needim. Bat sapos dadi or mami lusim famili long hom, hao nao datwan bae affectim feeling bilong famili and wei wea olketa fren witim Jehovah? (1 Timothy 5:8) Waswe, bae olketa dadi fit for gohed “stretem and trainim olketa [pikinini] followim samting wea Jehovah talem?” (Ephesus 6:4) Sapos hasband and waef no stap tugeta maet tufala kasem temptation for no faithful long tufala.—1 Corinth 7:5.

Hem tru, man seleva nao savve disaedem sapos bae hem muv go long nara ples. Bat bifor wanfala Christian disaed for duim olsem, bae hem gud for hem ting raonem evri samting firstaem and prea long Jehovah for helpem hem disaedem stretfala samting.—Luke 14:28.