Olketa wea Dae Savve Laef Bak Bikos Long Dae Bilong Jesus

Memorial savve mekem iumi tingim olketa blessing wea iumi bae kasem bikos long dae bilong Jesus, olsem wei wea iumi bae lukim moa olketa wea dae. Hem no plan bilong Jehovah for olketa man dae. Dastawe iumi savve sorre tumas taem samwan wea iumi lovem hem dae. (1Co 15:26) Jesus hem barava sorre taem hem lukim olketa disaepol bilong hem krae bikos Lazarus hem dae. (Joh 11:33-35) Jesus hem olsem Dadi bilong hem, so datwan mekem iumi sure Jehovah hem barava sorre taem hem lukim iumi feel sorre taem samwan wea iumi lovem hem dae. (Joh 14:7) Jehovah luk forward long datfala taem wea hem bae mekem olketa wea dae for laef bak, and iumi tu luk forward long datfala taem.—Job 14:14, 15.

Iumi sure taem God resurrectim pipol datwan bae followim arrangement bikos hem no laekem olketa samting for olobaot. (1Co 14:33, 40) Long datfala taem bae iumi no go long olketa funeral, bat maet iumi hipap for welkamim olketa wea laef bak. Waswe, iu savve tingting abaotem datfala taem wea pipol bae laef bak, especially taem iu feel sorre bikos samwan wea iu lovem hem dae? (2Co 4:17, 18) Waswe, iu thankiu long Jehovah bikos hem sendem kam Jesus for dae for iumi? And waswe, iu tinghae long wei wea Jehovah iusim Bible for helpem iu savve pipol wea dae bae laef bak?—Col 3:15.

• Hu nao iu barava luk forward for lukim taem hem laef bak?

• Hu long olketa man or woman wea Bible storyim nao iu laek for lukim and story witim?