“Torowe Olketa Laea God”

Jacob savve hem shud worshipim Jehovah nomoa, nomata God no putim eni law yet for no worshipim olketa idol. (Ex 20:3-5) So bihaen Jehovah talem Jacob for go bak lo Bethel, Jacob talem evriwan wea stap witim hem for torowe idol blo olketa. Olketa givim olketa idol hia lo Jacob and hem berem witim olketa earring, wea maet olketa iusim for protectim olketa from olketa demon. (Ge 35:1-4) Iumi sure Jehovah hapi lo samting wea Jacob duim.

Lo distaem, wanem nao iumi savve duim for showimaot iumi worshipim Jehovah nomoa? Wanfala important samting, hem for stap klia lo eniting wea join witim idol or spiritism. Datwan minim for torowem eni samting wea iumi iusim for protectim iumi from olketa demon. Hem gud for tingim tu: ‘Waswe, mi lukim kaen buk or movie wea storyim vampire, or nara samting wea join witim olketa demon? Waswe, mi lukim olketa buk or movie wea storyim magic or curse, olsem olketa samting nating nomoa?’ Iumi mas stap klia from eni samting wea Jehovah heitim.—Ps 97:10.

LUKIM VIDEO “AGAINSTIM DEVIL,” THEN ANSAREM OLKETA KWESTIN HIA:

• 

  Wanem nogud samting nao kasem wanfala Bible study, wea nem blo hem Palesa?

• 

  Why nao hem gud for askem help from olketa elder taem iumi deal witim eni samting wea join witim olketa demon?

• 

  Olketa wanem samting nao iumi mas torowem sapos iumi laekem Jehovah for blessim iumi?

• Wanem nao Palesa duim for kamap free from olketa demon?

• Lo ples wea iu stap, wanem nao samfala samting iu mas no duim mekem iu stap klia lo olketa demon?