Freedom lo Future, Bikos lo God and Christ

Olketa wanem samting nao iu stragol for deal witim evriday? Waswe, iu hed blo famili and garem staka responsibility? Waswe, iu wanfala singol parents wea stragol for provaed for famili? Waswe, iu young wan wea feisim hard taem from olketa narawan lo skul? Waswe, iu mas deal witim sik or wei for kamap olo? Iumi evriwan mas deal witim olketa hard taem. Staka brata and sista mas deal witim staka problem lo semtaem. Nomata olsem, iumi savve klosap bae iumi kamap free from olketa hard taem hia.​—2Co 4:16-18.

Go kasem datfala taem, iumi savve Jehovah hem luksavve lo wei wea iumi stragol, hem tinghae lo wei wea iumi faithful and no givap, and hem bae givim iumi olketa nambawan blessing lo future. (Jeremaea 29:11, 12) Jesus tu barava interest lo each wan lo iumi. Hem promis dat ‘bae hem stap witim iumi’ taem iumi gohed duim waka blo iumi olsem Christian. (Mt 28:20) Taem iumi stop and ting raonem freedom wea bae iumi kasem anda lo Kingdom blo God, bae hem strongim hope and wei wea iumi disaed for no givap nomata iumi mas deal witim olketa hard taem distaem.​—Ro 8:19-21.

WATCHIM VIDEO GOHED FOLLOWIM EXAMPLE BILONG JESUS TAEM END HEM KAKAM KLOSAP!​—OLKETA KINGDOM BLESSING, AND THEN ANSAREM OLKETA KWESTIN HIA:

• Hao nao gogo iumi evriwan farawe from God, and wat nao kamaot from datwan?

• Olketa wea faithful lo Jehovah, bae kasem wanem kaen future?

• Hao nao olketa samting hia bae kamap tru?

• Olketa wanem blessing lo promis niu world nao iu luk forward lo hem?