LAEF BILONG CHRISTIAN
Lukaotem Tingting blo God
Lo evri samting wea iumi duim, iumi laek for mekem Jehovah hapi. (Provebs 27:11, SIPB) For duim datwan, iumi need for mekem olketa disison wea followim tingting blo hem nomata no eni law hem stap wea storyim datwan. Wat nao savve helpem iumi for duim datwan?
Garem gudfala schedule for studyim Bible. Each taem wea iumi readim Bible, hem olsem iumi spendem taem witim Jehovah. Iumi savve lane abaotem hao Jehovah ting lo samting taem iumi lukim hao hem deal witim pipol blo hem and for lukluk gud lo olketa example blo olketa wea duim wanem Jehovah sei hem gud or nogud. Taem iumi need for mekem wanfala disison, holy spirit savve helpem iumi for tingim bak olketa important leson and principle wea iumi lanem from Bible.—Joh 14:26.
Duim research. Taem iu need for mekem wanfala disison, askem iuseleva, ‘Olketa wat kaen verse or story lo Bible nao savve helpem mi for luksavve lo tingting blo Jehovah abaotem diswan?’ Prea lo Jehovah for help, and iusim olketa research tul wea stap lo languis blo iu for faendem and followim olketa Bible principle wea fitim situation blo iu.—Sams 25:4, SIPB.
WATCHIM VIDEO IUMI MAS NO GIVAP FOR RAN—KAIKAIM HEALTHY KAIKAI, AND THEN ANSAREM OLKETA KWESTIN HIA:
Wat nao olketa pressure wea disfala young sista lo video feisim?
Hao nao iu savve iusim olketa research tul for helpem iu taem iu mas deal witim sem situation?
Hao nao iumi savve kasem gud samting taem iumi duim research and personal study wea savve helpem iumi for mekem olketa gud disison?—Heb 5:13, 14