Kwestin From Reader

Sapos wanfala brata divorcem waef blo hem then maritim narawan, bat datwan no followim wanem Bible talem, hao nao kongregeson bae ting lo marit blo hem bifor and niu marit blo hem?

Taem datwan hem happen, kongregeson bae ting lo marit blo hem bifor hem finis bikos hem marit niu moa, and datfala niu marit hem kamap legal. For minim why hem olsem, bae iumi storyim wanem Jesus hem sei abaotem taem man hem divorce and marit moa.

Lo Matthew 19:9, Jesus storyim only reason wea man savve finisim marit. Hem sei: “Eniwan wea lusim waef bilong hem and maritim narawan bae spoelem waef bilong hem bikos datwan hem adultery. Bat sapos waef hem durong, hem savve lusim hem.” Toktok blo Jesus showimaot (1) only reason lo Bible for man savve divorcem waef hem sapos waef durong, and (2) man wea divorcem waef nomata waef no durong, datwan hem adultery.a

Waswe, wanem Jesus talem hem minim man wea duim adultery and divorcem waef blo hem, hem free for marit moa? Hem depend lo disison blo waef, bikos taem hasband duim adultery and waef hem innocent, waef savve disaed sapos hem bae forgivim hasband or nomoa. Sapos waef no forgivim hem and tufala kasem finis legal divorce, tufala evriwan free for marit moa.

Bat maet datfala waef no laekem marit blo tufala for finis and talem hasband hem willing for forgivim hem. Hao sapos hasband gohed and divorcem waef blo hem, nomata waef no agree lo datwan? From waef willing for forgivim hem and no laekem marit blo tufala for finis, hasband bae no free for marit moa. Sapos hasband marit moa, hem no followim wanem Bible talem, and hem duim adultery moa. Datwan minim hem bae feisim nara judicial case witim olketa elder.—1 Cor. 5:1, 2; 6:9, 10.

Sapos man hem marit moa bat hem no free for marit followim wanem Bible talem, hao nao kongregeson bae ting lo marit blo hem bifor and niu marit blo hem? Nomata hem marit moa, hao, marit blo hem witim waef blo hem bifor no finis yet? Waswe, waef wea innocent still garem raet for disaed sapos bae hem forgivim hasband or nomoa? Nomata datfala niu marit hem legal, waswe, iumi ting lo tufala hia olsem tufala gohed for durong?

Lo bifor, sapos hasband hem marit moa, kongregeson ting lo tufala wea insaed lo datfala niu marit, tufala gohed for duim adultery go kasem taem datfala innocent waef hem dae, marit moa, or durong. Bat, taem Jesus storyim man wea divorce and marit moa, hem no talem eni samting abaotem datfala waef wea innocent. Hem sei nomoa man wea divorcem waef and marit moa, wea datwan againstim wanem Bible talem, hem duim adultery. So taem datfala man divorce and marit moa, wea Jesus sei datwan hem olsem adultery, marit blo hem bifor hem finis nao.

Sapos marit hem finis bikos hasband divorcem waef and marit moa, waef wea innocent no garem responsibility for disaed sapos hem bae forgivim hasband or nomoa, so hem no need for warim datwan. And tu, distaem kongregeson bae no ting lo datfala hasband wea marit moa hem gohed for duim adultery. And olketa no sei hem mas weit go kasem taem waef blo hem bifor hem dae, marit moa, or durong for hem free from datfala adultery.b

Lo example wea iumi storyim finis, hasband hem duim adultery, and gogo hem divorcem waef blo hem. Bat hao sapos hasband no duim adultery, bat hem divorcem waef and marit moa? Or hao sapos hasband no duim adultery bifor hem divorcem waef, bat hem durong bihaen hem divorce, then hem marit moa nomata waef willing for forgivim hem? Lo olketa situation hia, from hasband divorcem waef and marit moa, wea minim hem duim adultery, datwan hem end blo marit blo hem bifor. Datfala niu marit hem legal and hem showim marit blo hem bifor hem finis nao. Olsem The Watchtower blo November 15, 1979, page 32 storyim: “From hasband duim adultery, divorcem waef blo hem bifor, and marit moa, hem hard for hem go bak lo hem, bikos datfala marit hem finis nao.”

Nomata iumi garem niu wei for minim diswan, datwan no minim iumi shud ting smol lo marit, or tingse adultery hem no wanfala serious sin. Sapos wanfala man divorcem waef and hem marit moa bat hem no free for duim datwan followim wanem Bible talem, hem bae feisim judicial case bikos hem duim adultery. (Sapos niu waef hem wanfala Christian, hem tu bae feisim judicial case bikos hem duim adultery.) Nomata iumi no sei tufala wea insaed datfala niu marit gohed for duim adultery, datfala man no savve kasem eni privilege lo kongregeson for maet staka year. Nara samting wea bae stopem hem for kasem privilege, hem sapos olketa narawan savve abaotem samting wea happen and faendem hard for respectim hem. Olketa elder bae tingim tu situation blo datfala waef bifor wea hasband brekem promis for faithful lo hem, and tu, olketa bae tingim eni pikinini wea hasband lusim olketa.​—Mal. 2:14-16.

Staka nogud samting hem kamaot from man divorcem waef and marit moa taem hem no free for duim datwan. So, iumi olketa Christian laek for garem tingting blo Jehovah abaotem marit and tinghae lo datfala arrangement.​—Eklesiastes 5:4, 5; Heb. 13:4.