Waswe, Iu Savve Finis?

Wat kaen type chariot nao bigman blo Ethiopian raedem taem Philip go for meetim hem?

GREEK word wea olketa transleitim for “chariot” lo New World Translation hem savve minim olketa difren type chariot. (Acts 8:​28, 29, 38) Bat, luk olsem datfala bigman blo Ethiopian hem raedem wanfala chariot wea big winim wanfala smol military chariot or racing chariot. Bae iumi storyim samfala reason why olketa sei olsem.

Datfala bigman blo Ethiopia hem travel kam from farawe ples. Hem “wanfala bigman wea lukaftarem selen bilong queen bilong Ethiopia.” (Acts 8:27) Territory blo Ethiopia bifor hem includim Sudan and southern part blo Egypt distaem. Nomata datfala man blo Ethiopia no raedem sem chariot lo datfala full trip, hem mas tekem staka samting wea hem needim for datfala long trip. Samfala chariot wea olketa iusim lo first century for tekem olketa passenger olketa garem ruf and fofala wheel. Datfala buk Acts—An Exegetical Commentary sei: “Datkaen chariot garem moa spes for karem staka luggage, and luk olsem hem comfortable for travel insaed for long distance.”

Datfala bigman blo Ethiopia hem gohed read taem Philip kam for meetim hem. Bible sei: “Taem Philip ran go kasem chariot hia, hem herem datfala man hem readim profesi bilong Isaiah.” (Acts 8:30) Hao olketa designim olketa chariot hia, hem no for go fast. From datwan, hem isi for datfala man read and for Philip ran go for katsap witim chariot hia.

Datfala man blo Ethiopia “askem Philip for kam insaed long chariot and sidaon witim hem.” (Acts 8:31) Lo wanfala racing chariot, man wea raedem savve standap nomoa. Bat lo wanfala chariot wea olketa wakem for travel, hem garem inaf spes insaed for bigman blo Ethiopia and Philip for savve sidaon.

For fitim wanem Bible buk Acts chapter 8 storyim and olketa nara pruv lo history wea stap, olketa pablikeson blo iumi distaem iusim olketa piksa wea showim datfala bigman blo Ethiopia hem raedem chariot wea big winim wanfala smol military or racing chariot.