Waswe, Iu Tingim Yet?
Waswe, iu tingim yet samfala gud point from olketa Wastaoa blo disfala year? Trae ansarem olketa kwestin hia:
Hao nao Jehovah showimaot example lo wei for treatim olketa woman?
Hem treatim olketa woman and man semsem, and hem no fevarem olketa man winim olketa woman. God lisin lo olketa woman, and hem kea abaotem hao olketa feel and problem wea olketa kasem. Hem trustim olketa for duim waka blo hem.—w24.01, page 15-16.
Hao nao iumi savve followim Ephesus 5:7, wea sei: “Iufala mas no olsem olketa”?
Aposol Paul warnim iumi for no associate witim pipol wea bae mekem hem isi for iumi no followim olketa standard blo Jehovah. Datkaen wei for associate, hem no just minim wei for spendem taem witim pipol wea iumi meetim in person, bat hem minim tu pipol lo social media.—w24.03, page 22-23.
Wat nao samfala laea story wea iumi need for againstim?
Iumi mas barava careful lo olketa story wea kam from olketa brata or sista wea hem no garem eni pruv, olketa email wea iumi kasem from pipol wea iumi no savve lo olketa, and olketa apostate wea pretend for interest lo truth.—w24.04, page 12.
Wat nao iumi savve and wat nao iumi no savve abaotem hao Jehovah bae judgem King Solomon, olketa wea dae lo Sodom and Gomorrah and lo Flood?
Iumi no savve if Jehovah judgem olketa for dae for olowe. Bat iumi savve dat Jehovah hem savve gud lo evri samting and hem showim bigfala mercy.—w24.05, page 3-4.
From God hem “Rock,” datwan mekem iumi sure lo wat? (Deut. 32:4)
Jehovah hem sef ples blo iumi. Hem man wea iumi savve depend lo hem, hem evritaem keepim promis blo hem. And hem stedy bikos olketa wei and purpose blo hem no savve change.—w24.06, page 26-28.
Wat nao savve helpem iu for adjust lo niu kongregeson?
Depend lo Jehovah for helpem iu, olsem hem duim for olketa servant blo hem bifor. No comparem old kongregeson witim niu kongregeson. Joinim kongregeson activity, and trae for garem olketa niu frens.—w24.07, page 26-28.
Wat nao olketa leson wea iumi savve lanem from thrifala parabol wea stap lo Matthew chapter 25?
Parabol abaotem olketa sheepsheep and olketa goat mekhae lo wei for faithful and loyal. Datfala parabol abaotem faevfala virgin gele wea wise and faevfala wea no wise, hem storyim wei for mas redi and gohed lukaot. And parabol abaotem olketa talent, hem mekhae lo wei for mas waka hard and no lesy.—w24.09, page 20-24.
Hao hae nao varanda lo temple blo Solomon?
Lo 2 Chronicles 3:4, lo samfala old manuscript, disfala verse sei hem “120 cubit,” wea minim datfala varanda hem 53-meter (175-ft) hae. Bat, olketa nara important manuscript sei “hem 20 cubit,” wea minim hem 9 meter (30 ft) hae. Luk olsem, 20 cubit nao hem fitim thikness blo datfala wall lo temple.—w24.10, page 31.
Wat nao Bible minim taem hem sei ministerial servant mas “garem wanfala waef nomoa”? (1 Tim. 3:12)
Hem minim hem mas maritim wanfala woman nomoa and shud no durong. And tu, hem shud no showimaot interest wea no fitim lo olketa nara woman.—w24.11, page 19.
Why nao iumi sei John 6:53 hem no join witim Evening Kaikai blo Lord?
John 6:53 storyim hao hem important for kaikaim body blo Jesus and drinkim blood blo hem. Jesus talem disfala toktok lo 32 C.E., lo Galilee, taem hem story for olketa Jew wea no garem yet faith lo hem. Bat, datfala Evening Kaikai blo Lord hem kamap wan year bihaen lo Jerusalem. Lo datfala taem Jesus hem story lo olketa wea bae rul witim hem lo heven.—w24.12, page 10-11.