Putim Olketa lo Prison Bikos lo Faith blo Olketa—Crimea
Aggressive opposition wea Russian authorities duim againstim Olketa Jehovah’s Witness hem kasem Crimea tu. Lo Russia, gavman no only banim olketa legal entities blo olketa Witness bat wat hem duim hem showim klia dat hem laek for aotem peaceful worship blo olketa. Since ban hem start lo April 2017, Russian authorities reidim staka gathering blo olketa Witness lo Russia, and result blo datwan olketa arrestim and putim staka Witness lo prison. Semkaen violent treatment hia olketa iusim tu againstim Olketa Jehovah’s Witness lo Crimea distaem.
Firstaem wea olketa reidim olketa Witness lo Crimea hem happen lo November 15, 2018, lo Dzhankoy, taem samting olsem 200 police and officer blo special forces reidim eitfala haos wea olketa smol grup blo olketa Witness meet tugeta for readim and discussim Bible. At least 35 armed officers wea werem mask brek in and enterim haos blo Sergey Filatov, wea wanfala grup blo sixfala Witness hipap lo there. Disfala aggressive akson hem kosim trauma for olketa Witness hia. Wanfala 78 year old man olketa pushim hem againstim wall, daonem hem lo graon, handcuffim hem, and kill nogud lo hem and endap olketa mas rush witim hem lo hospital. Nara tufala olo man barava traumatize lo samting wea happen so olketa rush witim tufala lo hospital tu bikos blood pressure blo tufala hem barava sut up. Sorre samting, wanfala woman wea babule wea olketa reidim haos blo hem tu hem miscarriage.
Bihaen datfala reid, olketa openem wanfala criminal case againstim Sergey anda lo Article 282.2(1) blo Russian Criminal Code and sei hem organizem activity blo wanfala “extremist organization.” Lo March 5, 2020, distrik kot lo Crimea sentencem Sergey for six years insaed wanfala general regime prison colony. Bihaen olketa sentencem hem, olketa escortim hem go stret lo prison.
Lo olketa years bihaen lo 2018 reid lo Dzhankoy, olketa officer blo special forces continue for brek in and enterim haos blo olketa Witness wea olketa suspectim lo extremist activity. Latest reid hem happen lo August 7, 2024, taem samfala armed and law enforcement officers wea werem mask duim search lo haos blo faevfala Witness, includim haos blo Tamara Brattseva, wea 68 years old, lo vilij blo hem lo Razdolnoye. Olketa chargem Tamara, for organizem olketa activity blo wanfala extremist organization, and kot case blo hem still gohed. Lo October 2024, tufala Witness man, Yuriy Gerashchenko and Sergey Parfenovich, olketa sentencem for six years each insaed wanfala penal colony. Firstaem tufala kasem suspended sentence, bat prosecutor gohed ask for harsh panisment, and kot givim wat hem askem. Olketa arrestim tufala lo kotrum and transfarem tufala go lo prison.
Result blo olketa haos reid wea olketa duim and olketa criminal case and sentence, distaem 14-fala Witness man nao stap lo prison and sentence blo olketa hem ap tu six and a haf years. Olketa chargem evriwan hia bikos olketa sei olketa promotim olketa activities blo wanfala extremist organization.
Taem Laen
July 18, 2025
Fotinfala Jehovah’s Witness from Crimea stap lo prison distaem.
October 3, 2024
Yuriy Gerashchenko and Sergey Parfenovich kasem sentence for stap six years lo wanfala penal colony.
August 7, 2024
Olketa officer blo law enforcement reidim faevfala haos blo olketa Witness lo Alushta, Razdolnoye, and Senokosnoye. Olketa openem criminal case againstim Tamara Brattseva.
August 5, 2021
Eitfala haos blo olketa Witness nao olketa duim search lo hem. Olketa arrestim Aleksandr Dubovenko and Aleksandr Litvinyuk.
October 1, 2020
Naenfala haos olketa reidim lo Sevastopol. Olketa arrestim Igor Shmidt and putim hem lo pretrial detention.
June 4, 2019
Olketa officer blo special forces reidim tenfala haos lo Sevastopol. Bihaen datwan olketa chargem Viktor Stashevskiy for organizem extremist activities.
March 20, 2019
Olketa officer blo special forces reidim eitfala haos lo Alupka and Yalta. Olketa kwestinim and chargem Artem Gerasimov for organizem extremist activities.
November 15, 2018
Ova 200 police and officer blo special forces reidim eitfala haos blo olketa Witness, includim haos blo Sergey Filatov.