World wea Huk Long Smoke
BILL hem wanfala kaen man, wanfala kleva man, wanfala strong man. Hem lovem famili bilong hem. Bat, from taem hem young, hem start for smokem cigarette. Gogo taem hem olo hem heitim diswan. Nomata long taem wea hem smoke, hem strong for warnim olketa son bilong hem againstim smoke, and sei hem barava krangge samting. Samfala taem hem smasem packet cigarette insaed strongfala hand bilong hem and torowem narasaed long rum, and promis hao datwan nao last smoke bilong hem. Bat no longtaem bihaen, hem start for smoke moa—firstaem hem duim haed, then bihaen front long eniwan.
Bill hem dae from cancer 15 year go finis, bihaen planti month wea hem kasem barava nogud pain. Sapos hem no smoke, maet hem laef yet distaem. Waef bilong hem bae still garem hasband; olketa son bilong hem bae still garem dadi.
Dae bilong Bill, nomata diswan hem bigfala hevi for famili, no hemseleva nomoa kasem diswan. World Health Organization (WHO) sei olketa sik wea tobacco kosim hem killim dae klosap foa million pipol evri year, or wanfala man insaed evri eit second. Long world distaem, wei for iusim tobacco nao main samting for kosim sik wea iumi fit for stopem. Sapos diswan go ahed, bihaen 20 year, smoke nao bae main samting long world wea kosim dae and disable, killim dae moa pipol winim evri samting hia tugeta olsem AIDS, tuberculosis, dae from bornem pikinini, accident long trak, suisaed, and killim man dae.
Cigarette savve killim man dae. Bat pipol wea smoke stap evriwea. WHO hem sei samting olsem 1.1 billion pipol nao smoke long world. Datwan minim samting olsem wanfala long evri thrifala full-grown man long world.
Samfala pipol wea duim research sei nomata olketa tobacco kampani peim staka million dollar bikos samfala tekem olketa long kot, disfala selen hem smol nomoa sapos iu markem witim planti billion dollar wea olketa kasem. Long United States nomoa, olketa tobacco kampani wakem samting olsem 1.5 billion cigarette evriday. Raonem world, olketa tobacco kampani and bisnis wea gavman ownim olketa sellim winim faev thousand billion cigarette evri year!
Why nao staka pipol go ahed for smoke nomata hem savve killim man dae? Sapos iu man wea smoke, hao nao iu savve lusim? Olketa next article bae ansarem olketa kwestin hia.