Tingting Bilong Bible
Hu Nao Wanfala Minister?
LONG evening bilong dae bilong Jesus, olketa barava klos fren bilong hem insaed long bigfala raoa. Luke 22:24, hem talem “bigfala raoa kamap midolwan long olketa abaotem hu nao nambawan.” Diswan hem no firstaem kaen raoa olsem kamap midolwan long olketa aposol bilong Jesus. Tufala taem bifor, Jesus mas stretem tingting bilong olketa.
Sorre tumas hao long datfala barava hard naet, Jesus need for talem moa long olketa wanem nao trufala mining bilong wanfala Christian minister. Hem sei: “Letem man wea nambawan midolwan long iufala kamap olsem smol wan, and man wea chief olsem man wea duim waka.”—Luke 22:26.
Iumi shud no sapraes long wei wea olketa aposol garem rong tingting abaotem hao important nao position and bigfala nem. Bifor Jesus, olketa scribe and Pharisee nao provaedem main example long saed long leader bilong religion. Olketa shud givim pipol samting for directim and leadim olketa long spiritual wei, bat olketa false minister hia saportim hardfala kastom and olketa rul wea “satem kingdom bilong heven front long olketa man.” Olketa laekem bigfala position, lukaotem bigfala nem, olketa tingim olketa seleva and laek for duim waka “for olketa man lukim.”—Matthew 23:4, 5, 13.
Wanfala Niu Kaen Minister
Bat, Jesus, startim wanfala niu idea for duim spiritual ministry long olketa disaepol bilong hem. Hem teachim: “No letem eniwan kolem iufala Rabbi, from wanfala nomoa hem teacher bilong iufala, bat iufala evriwan olketa brata. And tu, no kolem eniwan father bilong iufala long earth, from wanfala nomoa hem Father bilong iufala, Datwan long heven. . . . Bat man wea nambawan midolwan long iufala mas kamap servant bilong iufala.” (Matthew 23:8-11) Olketa disaepol bilong Jesus mas no followim olketa leader bilong religion long taem bilong olketa. Sapos olketa laek for kamap trufala minister, olketa mas followim Jesus. Wanem kaen example nao hem leavim?
Planti taem Bible iusim Greek word di·aʹko·nos for “minister.” The Encyclopedia of Religion explainim hao disfala word stand for “no position bat wei wea minister duim samting for datwan wea hem servem: wei for followim example bilong Christ . . . hem important part long wei wea olketa Christian minim ministry.”
For join witim stretfala mining bilong word “minister,” Jesus givim hemseleva for servem olketa narawan. “Son bilong man hem kam,” hem explainim long patient wei, “no for olketa servem hem, bat for serve and for givim soul bilong hem olsem ransom for baem bak planti pipol.” (Matthew 20:28) Jesus long wei wea no selfish iusim taem, strong, and savve bilong hem for helpem olketa narawan long physical and spiritual wei. Why nao olsem? Bikos hem barava feel sorre for olketa crowd wea pipol spoelem long spiritual wei wea kam for lukim hem. Hem laek for help. Kaenfala love nao muvim waka bilong hem, and hem laekem olketa disaepol bilong hem for showimaot semkaen wei for give.—Matthew 9:36.
Long full laef bilong hem, Jesus showim example for olketa minister long future. “Harvest hem big,” hem sei, “bat olketa wakman no staka. Dastawe, askem Masta bilong harvest for sendem aot olketa wakman long harvest bilong hem.” (Matthew 9:37, 38) Tru nao, olketa minister bilong Christ nao bae waka long nambawan waka wea nating kamap long world bifor—for provaedem spiritual comfort for evri man long wei for preachim and teachim gud nius abaotem Kingdom bilong God.—Matthew 28:19, 20.
Disfala wei for mekhae long wei for give and for servem need bilong olketa narawan hem mekem wei wea Christ waka olsem minister hem spesol. Hem teachim olketa minister bilong hem for kamap wakman, olketa spiritual fisherman and shepherd, no olketa spesol savveman wea werem spesol kaleko and enikaen stael samting.—Matthew 4:19; 23:5; John 21:15-17.
Tingting Bilong Bible
Sorre tumas, insaed planti handred year disfala tingting hao minister hem minim olketa preacher and teacher wea sakrifaesim seleva hem change. Samting wea start olsem Christian ministry hem kamap wanfala arrangement wea garem olketa difren position bilong olketa bigman long church. Olketa startim olketa difren position long church, and givim bignem and paoa long olketa and planti taem olketa kasem rich samting. Diswan mekem wei for divaed kamap. Wanfala sekson bilong olketa bigman kamap wea main waka olketa duim nao hem for followim olketa kastom bilong church and kaonselem olketa wea bakslaed. Christian religion bilong first century hem change insaed long olketa year bihaen from wanfala religion wea busy and evriwan hem wanfala minister, go long wanfala religion wea no duim eni samting and wanfala sekson wea kasem spesol training nomoa fit for preach and teach.
Nomata olsem, Bible luksavve long wanfala Christian minister, no from spesol kaleko, kastom, salary, or law bilong gavman, bat from waka bilong hem wea no selfish. Aposol Paul talemaot tingting wea olketa Christian minister shud showimaot. Hem encouragem olketa for ‘no duim eni samting thru long wei for tinghae tumas long seleva bat witim hambol mind.’—Philippians 2:3.
Paul go ahed for duim wanem hem preachim. Long wei for followim example bilong Christ, hem nating lukaotem “gud samting for [hemseleva] bat for evriwan, mekem olketa maet sev.” Hem luksavve and barava feelim responsibility bilong hem for “provaedem gud nius wea no garem kost,” olsem hem sei, “go kasem end mekem mi maet no spoelem paoa bilong gud nius.” Hem no “lukaotem praise from olketa man.”—1 Corinthians 9:16-18; 10:33; 1 Thessalonians 2:6.
Hem barava nambawan example bilong trufala Christian minister! Olketa wea followim nambawan example bilong hem and wakabaot followim wei wea no selfish wea Christ Jesus showimaot, givim olketa seleva free for provaedem spiritual help and comfort bilong gud nius long olketa narawan, showim olketa seleva olsem trufala minister bilong God.—1 Peter 2:21.