Tingting Bilong Bible
Hu Nao Datfala Antichrist?
“IUFALA HEREM ENEMY BILONG CHRIST [ANTICHRIST] BAE KAM.”—1 JOHN 2:18.
SAPOS iu kasem warning hao wanfala criminal wea danger tumas hem kam long area wea iu stap, wanem nao bae iu duim? Maet iu lukaotem eni information abaotem lukluk and teknik bilong hem. Iu bae stap redy.
Semkaen samting hem happen distaem. Iumi kasem warning from toktok bilong aposol John: “Evri toktok wea kam from spirit wea no biliv long Jesus hem no kam from God. And tu, diswan nao toktok wea kam from spirit wea bilong enemy bilong Christ [antichrist] wea iufala herem bae kam, and distaem hem stap long world.” (1 John 4:3) Waswe, wanfala antichrist and man for giamanim olketa man, hem stap distaem wea mekem evri man stap long danger?
John iusim datfala toktok “enemy bilong Christ” faevfala taem insaed tufala leta bilong hem. Diswan minim wanfala samting wea againstim teachim bilong Bible abaotem Christ and insaed diswan hem olketa man for giaman wea sei olketa nao Christ or Christ sendem olketa kam. Bible givim information wea iumi fit for trustim abaotem datfala antichrist. Bat, olsem hem tru samfala taem saed long olketa criminal, pipol interest tumas long olketa report wea no garem pruv abaotem disfala enemy winim wei for interest long tru samting.
Mistek for Sei Hu Nao Diswan
Start kam from taem bilong aposol John, samfala man sei toktok bilong John abaotem datfala antichrist hem minim wanfala man nomoa. Pipol talem olketa difren kaen idea abaot hu nao hem. Planti handred year go finis, planti pipol tingse Roman Emperor Nero nao datfala antichrist. Bihaen, planti pipol feel sure Adolf Hitler nao datfala antichrist bikos long bigfala heit and fraet wea hem bihaenem. Olketa iusim datfala toktok tu for German savveman Friedrich Nietzsche. Samfala narawan biliv hao datfala antichrist hem no kam yet and hem bae showaot olsem wanfala bigman bilong politik wea raf and kleva and want for rulim full world. Olketa biliv datfala wild animal long Revelation chapter 13 barava minim datfala antichrist wea John tok abaotem. Olketa sei mark bilong hem, 666, bae mekem pipol luksavve long disfala man wea bae mekhae long wicked fasin long future.
Olketa wea talemaot kaen idea olsem tingse John point go long wanfala antichrist nomoa. Bat toktok bilong hem showimaot wanem? Tingim 1 John 2:18: “Olsem iufala herem enemy bilong Christ [antichrist] bae kam, distaem tu planti enemy bilong Christ stap.” Tru nao, “planti enemy bilong Christ,” no wanfala nomoa, garem blame for datfala taem bilong spiritual problem long first century. Distaem planti enemy nao insaed datfala sekson bilong antichrist, no wanfala nomoa. Olsem wanfala sekson, olketa spoelem olketa man long spiritual wei. (2 Timothy 3:1-5, 13) Hu nao datfala antichrist?
Tingim datfala wild animal long Revelation chapter 13. Aposol John hem raet: “Wild animal wea mi lukim hem olsem wanfala leopard, bat leg bilong hem olsem leg bilong bear, and mouth bilong hem olsem mouth bilong lion.” (Revelation 13:2) Wanem nao olketa samting hia minim?
Olketa savveman long Bible lukim wei wea Revelation chapter 13 and Daniel chapter 7 join tugeta. God givim Daniel wanfala vision bilong olketa tokpiksa wild animal, and insaed diswan hem wanfala leopard, wanfala bear, and wanfala lion. (Daniel 7:2-6) Hao nao profet bilong God minim olketa? Hem talem hao olketa wild animal hia piksarem olketa king bilong earth, or olketa gavman. (Daniel 7:17) So iumi fit for sei datfala wild animal bilong Revelation hem piksarem olketa gavman bilong man. From olketa gavman hia againstim Kingdom bilong God, olketa nao part bilong datfala antichrist.
Hu Moa Hem Part Long Datfala Antichrist?
Taem Christ, Son bilong God, stap long earth, hem garem planti enemy. Nomata distaem olketa no savve attakim hem, hem garem planti enemy. Lukim hu nao olketa hia.
Aposol John hem sei: “Hu nao man wea laea sapos hem no datwan wea denyim Jesus nao hem Christ? Diswan nao hem antichrist, datwan wea denyim Father and Son.” (1 John 2:22) Olketa apostate and leader bilong giaman worship twistim olketa kliafala teaching bilong Jesus for mekem hem kamap olketa giaman teaching bilong religion. Olketa man olsem rejectim truth bilong Bible and spreadim olketa laea samting long nem bilong God and Christ. Thru long Trinity teaching, olketa denyim trufala position bilong Father and Son. Dastawe, olketa tu part long datfala antichrist.
Long Luke 21:12 Jesus warnim firstaem olketa disaepol bilong hem: “Pipol bae kasholem iufala and persecutim iufala, tekem iufala go long olketa synagogue and prison . . . for nem bilong mi.” Start kam from first century, olketa tru Christian stand strong long barava nogud persecution. (2 Timothy 3:12) Olketa wea kosim kaen persecution olsem olketa againstim Christ. Olketa tu part long datfala antichrist.
“Man wea no long saed bilong mi hem againstim mi, and man wea no hipap witim mi hem torowe olabaot.” (Luke 11:23) Long hia Jesus talemaot hao evriwan wea againstim hem and olketa purpose bilong God wea hem saportim, olketa mas part long datfala antichrist. Wanem nao bae happen long olketa hia?
Wanem Nao Bae Happen Long Olketa Antichrist?
Psalm 5:6 hem sei: “[God] bae distroem olketa wea tok laea. Jehovah barava heitim man wea giaman and kapsaetem blood.” Waswe, diswan fitim olketa antichrist? Yes. Aposol John hem raet: “Planti man for giaman kam insaed long world, olketa man wea no bilivim Jesus Christ hem kam long body. Diswan nao man for giaman and enemy bilong Christ [antichrist].” (2 John 7) From olketa laea and from giaman wei bilong olketa, Olmaeti God bae finisim olketa antichrist.
From datfala taem for panisim olketa hem kakam klosap, olketa tru Christian mas no letem giaman wei and hevi from olketa wea againstim olketa Christian, especially olketa apostate, for mekem faith bilong olketa wikdaon. Warning bilong John hem important tumas: “Iufala mas lukaot, mekem iufala no lusim olketa samting wea iumi wakem tugeta, bat for iufala savve kasem full reward.”—2 John 8.
[Credit Line long page 30]
Nero long page 2 and 30: From Visitors of the Ashmolean Museum, Oxford