Grass​—No Just Green Samting Andanit Leg Bilong Iu

FOR samfala hem just green samting raonem haos wea olketa mas brasim. Bat, for olketa farmer and man for plei soccer, hem join witim waka bilong olketa. And for olketa pikinini, hem nambawan ples for plei. Bat, waswe, disfala word grass hem minim nomoa grass wea grow raonem haos, long olketa farm, or pleigraon?

Sapos iu stap insaed wanfala haefala building, maet iu tingse grass hem no samting wea affectim laef bilong iu. Bat, grass and samting wea kam from hem, hem affectim klosap iumi evriwan evriday. Wanem nao grass? And hao nao iumi iusim?

Wanem Nao Grass?

Bae iumi lukluk moa klos long disfala plant. Planti taem, pipol sei enikaen shortfala plant wea green, hem nao grass. Witim olketa plant wea olketa scientist kolem grass (Gramineae, or Poaceae), samfala sei olketa sedge and rush tu grass. Bat olketa plant wea olketa kolem grass, hem nomoa trufala grass. Evri grass plant hia garem semkaen spesol part. Lukluk gud long wanfala grass stem.

Waswe, datfala stem hem raon and emti, and hem garem olketa node, or join? Waswe, olketa leaf bilong hem long, flat, and thin, garem olketa vein olsem olketa laen and olketa kamaot from wanfala sheath wea stap raonem stem? Waswe, hem garem leaf long wansaed then nextfala leaf long narasaed wea mekem tufala laen? Waswe, winim wei for garem wanfala main rut, hem garem staka thin rut wea tan olabaot? Sapos iu savve lukim eni flaoa, waswe, olketa smol and hard for lukim, and olketa followim spike, raceme, or panicle design? Sapos iu savve ansarem yes long olketa kwestin hia, then luk olsem datfala plant hem wanfala kaen grass.

Nomata olketa difren kaen grass luk semsem long planti wei, samting olsem 8,000 go kasem 10,000 difren kaen grass stap. Hae bilong olketa plant savve barava difren. Samfala tufala centimeter nomoa, and samfala olsem bambu savve grow foti meter hae. Grass hem main wan long olketa plant wea kavarem earth. And iumi no sapraes long diswan bikos hem plant wea savve change fitim eni ples long earth. Hem savve grow long olketa barava cold ples and long olketa desert, long olketa tropical rain forest, and saed long olketa maunten wea wind hem blow olowe. Grass hem main plant long samfala big level area wea no garem tree long south east Europe or Asia, long South America, especially Argentina and long United States and Canada, especially long Midwest and West, and samfala big level area long tropical ples wea garem samfala tree nomoa.

Strong bilong planti difren kaen grass nao wanfala reason why hem win for grow gud. Long wei wea difren from planti nara plant, grass hem no grow kam from top bilong hem bat from olketa area antap long olketa node. And olketa niu shoot savve kamaot from olketa stem wea grow followim graon antap or andanit long hem. So taem man brushim grass or teeth bilong buluka katem top bilong hem, datfala grass hem go ahed for grow, bat sapos iu katem planti nara plant long wei olsem, bae olketa no grow moa. Dastawe for brushim grass evritaem savve mekem hem grow gud and luk naes tumas and hem stopem olketa nara plant for grow midol long hem.

And tu, sapos wind bendim stem or samwan purubutim, datfala grass savve grow moa fast long saed wea leidaon for mekem hem standap moa. Dastawe, grass savve kwiktaem kamap gud moa winim olketa nara plant wea stragol for kasem laet from sun. And iumi savve hapi hao grass hem wanfala strong plant olsem, from iumi depend long hem.

Plant wea Iumi Iusim for Staka Samting

Grass hem no just plant wea stap evriwea long earth bat hem barava important tu winim eni nara plant wea garem flaoa. Wanfala man wea studyim olketa plant sei grass hem faondeson bilong kaikai bilong iumi. Hem “olsem wanfala dam wea protectim olketa man from bigfala hangre.” Ting bak long wanem nao iu kaikaim tuday. Waswe, iu kaikaim eni samting olsem millet, rice, oats, or sorghum? Sapos olsem, iu kaikaim olketa grass seed. Or maet iu kaikaim bun or narakaen bred. Flour wea olketa iusim for wakem datwan hem kam from midol part bilong grass seed—wheat, rye, barley, and olketa nara grain, evriwan hia grass. Cornflakes and corn pudding and tortilla tu kam from corn flour. Iu savve, corn tu hem wanfala grass. Waswe, iu putim sugar insaed tea or coffee bilong iu? Big haf long sugar wea pipol kaikaim hem kam from sugarcane, wanfala grass. Iumi fit for sei milk and cheese tu kam from grass, bikos planti taem grass nao kaikai bilong olketa buluka, sheep, and goat.

Waswe samting wea iu kaikaim long lunch? Cake and noodle kam from wheat flour. Olketa kokorako and nara bird planti taem kaikaim grain. Olketa buluka kaikaim planti difren kaen grass. So, wei wea olketa animal kaikaim grass provaedem iumi witim olketa egg, kokorako, and beef for kaikaim. And iu savve drinkim grass tu. No just milk nomoa bat samfala alcohol wea pipol laekem kam from grass: beer, whiskey, rum, sake, kvass, and samfala vodka.

No wari sapos mifala no talem kaikai wea iu barava laekem tumas. Hem hard tumas for listim evri kaikai wea kam from grass. Samfala sei, big haf long kaikai wea pipol kaikaim long full world, hem kam from olketa difren kaen grass. Iumi no sapraes long diswan bikos grass hem kavarem samting olsem 70 percent bilong graon wea pipol mekem garden long hem!

Bat, grass hem no samting wea gud for kaikaim nomoa. Sapos iu wakem olketa wall long haos bilong iu from clay and straw, datfala grass nao mekem hem strong. Long samfala difren part long world, pipol wakem ruf from grass. Long Southeast Asia pipol iusim bambu for mekem olketa scaffold, olketa wata pipe, furniture, wall, and planti nara samting. Olketa wakem mat and basket from grass, and hem samting wea insaed glue and pepa tu. Tingim tu kaleko bilong iu. Planti wool and leather wea iumi iusim hem kam from olketa animal wea kaikaim grass. Wanfala kaen grass wea garem nem Arundo donax, olketa iusim for wakem reed for olketa woodwind music instrument, olsem clarinet. No eni nara samting winim datfala grass for mekem datfala natural reed.

Grass hem kavarem and mekem planti ples long earth luk naes. And wanfala green field or grass area wea pipol keepim gud hem barava luk peaceful and naes! From staka grass stap hem provaedem staka oxygen. And tu, olketa thin rut bilong hem protectim datfala graon from wind and wata. Taem iu tingim evri samting wea grass savve duim, iumi no sapraes for lane hao pipol bin iusim and growim grass from bifor kam.

History Bilong Grass

Firstaem iumi here abaotem grass hem long story bilong creation insaed long Bible. Long mek-thri day bilong creation, God hem sei: “Letem earth mekem grass for grow.” (Genesis 1:11)a Thru long history, pipol bin depend long samfala kaen grass. Olsem example, pipol bilong Egypt, Greece, and Rome bifor kaikaim wheat and barley olsem main kaikai bilong olketa; pipol long China kaikaim millet and rice; olketa Indus pipol kaikaim wheat, barley, and millet; and olketa Maya, Aztec, and Inca pipol kaikaim corn. And olketa bigfala level ples wea no garem tree provaedem grass for olketa horse bilong olketa Mongol army. Tru tumas, from bifor kam grass hem barava important long olketa man.

Next taem iu lukim wanfala field wea corn hem grow, wanfala naes green field, or taem iu lukim olketa leaf bilong grass grow insaed krak long road, maet iu stop and ting raonem disfala nambawan plant wea iumi iusim for staka samting. Maet datwan muvim iu tu for thankiu long Nambawan Man for Designim Samting, Jehovah God, olsem man for raetem psalm wea sing: “O Jehovah, God bilong mi, iu nao nambawan. . . . Hem mekem green grass grow for olketa animal, and olketa plant for olketa man iusim, for mekem kaikai kamaot from earth . . . Praisem Jah, iufala pipol!”—Psalm 104:1, 14, 31-35.

[Footnote]

[Olketa piksa long page 16, 17]

(Lukim pablikeson for olketa nara information)

Olketa part bilong grass plant

Main sheip bilong olketa grass flaoa

Spike

Raceme

Panicle

Fibrous rut

Sheath

Leaf

Stem

Node

[Piksa long page 18]

Waswe, iu kaikaim grass bilong iu tuday?

[Piksa long page 18]

Or waswe, iu drinkim?

[Piksa long page 18]

Olketa tu kaikaim grass

[Piksa long page 18]

Iu savve stap insaed samting wea olketa mekem from grass tu