Hu Nao Bae Mekem Peace for Olowe Kamap?
WHY nao God no ansarem olketa prea for peace wea olketa leader bilong olketa difren religion long world talem? Bible hem talem barava interesting ansa. Hem no from God no interest long peace—hem laekem tumas peace for kamap winim olketa bigman bilong religion wea prea for datwan. Tru nao, God mekem olketa arrangement finis for mekem world peace kamap. Hem duim samting finis for kasem datfala goal. Hem talemaot klia goal bilong hem long olketa man. Bat, sorre tumas, olketa religion bilong world barava ting nating long samting wea God hem talem.
Longtaem go finis God promis for sendem wanfala “seed,” wanfala ruler wea Bible showimaot klia tumas hu nao hem. (Genesis 3:15; 22:18; 49:10) Profet Isaiah, wea talem planti spesol profesi abaotem Messiah, hem raet abaotem wei wea disfala Leader bae kamap “Prince bilong Peace” ovarem earth and anda long rul bilong hem, “peace bae no savve finis.” (Isaiah 9:6, 7) Olsem wanfala Ruler long heven, hem bae duim samting for distroem wicked pipol and changem disfala earth for kamap wanfala paradaes, wea fasin for no followim justice, sik, poor living, and dae bae no stap. Peace and laef olowe nao bae go ahed. (Psalm 72:3, 7, 16; Isaiah 33:24; 35:5, 6; Daniel 2:44; Revelation 21:4) Wanem taem nao diswan bae happen?
World Peace Klosap Kam
Jesus talem olketa disaepol bilong hem hao bifor long end bilong disfala wicked system and start bilong wanfala niu community bilong olketa man, olketa important samting bae happen long world wea bae mekem full world seke, and bae evri samting hia happen insaed wanfala sekson bilong taem. (Matthew 24:3, 7-13) From taem bifor kam, planti long olketa samting hia—war, hangre, and olketa earthquake, wea hem thrifala nomoa long olketa samting hia—kamap evritaem. Bat, no enitaem bifor olketa samting hia spoelem olketa man long semtaem evriwea long world olsem hem kamap long taem bilong iumi. And samting wea kamaot from olketa bigfala trabol olsem hem moa worse winim bifor bikos earth distaem garem staka pipol.
Narafala samting wea Bible sei bae happen hem wei wea olketa man bae go ahed for spoelem environment. (Revelation 11:18) And tu, bifor end hem kam, wanfala warning waka bae kamap evriwea long world, hem nao for preachim “gud nius bilong kingdom.” Distaem Olketa Jehovah’s Witness go ahed for duim datfala waka evriwea long world.—Matthew 24:14.
Wei wea olketa profesi hia fulfill hem gud nius for olketa man wea faithful. Olsem profesi showimaot, wanfala niu world bilong peace evriwea hem klosap tumas for kamap! Datwan minim fasin for heit and terrorism bae finis evribit. Bible explainim olsem: “Olketa bae no spoelem eniwan or spoelem eni samting long holy maunten bilong mi; from earth bae fulap witim savve bilong Jehovah olsem wata hem kavarem sea.”—Isaiah 11:9.
Olketa Prea wea God Herem
Wei for prea long God hem no iusles samting or samting for duim nating. Bible kolem Jehovah “Man wea herem prea.” (Psalm 65:2) So, long enitaem, hem savve lisin long evri prea wea olketa honest pipol long earth talem. Bat waswe, samfala mark stap for man kasem bifor God savve herem prea bilong hem? Bible sei pipol wea garem honest heart wea lanem truth bilong Bible abaotem God need for duim samting followim datfala truth, for kamap olketa “trufala worshiper,” wea worshipim hem “witim spirit and truth.” (John 4:23) Hem no herem olketa prea bilong pipol wea no respectim samting hem askem: “Man wea tanem ear bilong hem for no herem law [bilong God]—prea bilong hem tu samting nogud.”—Proverbs 28:9.
Sorre tumas, planti leader bilong religion distaem no teachim or prea abaotem purpose bilong God for mekem peace kamap. Bat, olketa prea for olketa gavman bilong man for stretem olketa problem olsem, nomata Word bilong God talem stret “hem no bilong man wea wakabaot for disaedem gogo bilong hem.”—Jeremiah 10:23.
Profesi talem hao “long lastfala part bilong olketa day,” long taem bilong iumi, pipol wea lovem peace bae go long tokpiksa “maunten bilong haos bilong Jehovah”—wea hem nao, tru worship. Olketa hia bae mekem planti bigfala change long laef bilong olketa: “Olketa mas hammerim sword bilong olketa for kamap hou and spia bilong olketa for kamap naef for katem tree. Nation bae no iusim sword againstim narafala nation, and olketa bae no lanem war moa.”—Isaiah 2:2-4.
Waswe, eni sekson bilong pipol wea worship distaem trae for followim toktok hia? Or waswe, evri religion story nomoa abaotem peace and long semtaem saportim war? Next taem iu meetim Olketa Jehovah’s Witness, mifala invaetem iu for storyim disfala subject bilong peace witim olketa and lanem wanem religion nao teachim pipol for stap long peace witim evriwan.