Wanfala Man wea Disaed for Obeyim God

LONG olketa hard taem bilong 1937, taem olketa difren idea bilong pipol mekem raoa kamap long olketa kantri long Europe, olketa tru Christian feisim olketa hard disison. Waswe, bae olketa obeyim God or olketa man? (Acts 5:29) Olketa young man wea kasem age wea fitim for go long army savve hao wei for obeyim God minim olketa maet dae.

Antonio Gargallo hem wanfala young man from Spain wea hem 19 year wea feisim datfala disison. War hem go ahed long Spain for wanfala year finis taem olketa kolem hem for joinim army bilong General Franco. Long year bifor datwan, Antonio baptaes and kamap wanfala Jehovah’s Witness, and hem readim long Bible hao olketa servant bilong God no teksaed and no lanem war. (Isaiah 2:4; John 17:16) From hem no willing for kamap wanfala soldia and killim dae olketa man long kantri bilong hem, hem trae for ranawe go long France. Bat olketa kasholem hem and tekem hem go long wanfala army barrack long Jaca, Huesca, klosap long border bilong France.

Wanfala military kot offerim hem wanfala hard disison: chus for join long army or for olketa killim hem dae. Antonio disaed for obeyim God. Bifor olketa killim hem dae, hem raetem disfala leta long mami and sista bilong hem, wea no Jehovah’s Witness:

“Olketa arrestim mi finis, and nomata olketa no letem mi for talem eni samting, olketa judgem mi for dae. Long disfala naet bae mi dae nao. No sorre or krae. . . , bikos mi obeyim God. Sapos hem will bilong God, mi bae kasem wanfala niu laef wea moabeta. . . . Mi barava feelim peace taem mi kasem nao olketa last hour bilong laef bilong mi. Plis acceptim from son and brata wea lovem iutufala tumas wanfala last hug.”a

Thrifala soldia sei taem hem go for olketa killim hem dae, Antonio singim olketa singsing bilong praise long Jehovah. God and Son bilong hem no savve forgetim olketa sakrifaes olsem. Iumi fit for feel sure olketa faithful Christian, olsem Antonio, bae kasem reward thru long resurrection.—John 5:28, 29.

[Footnotes]