Important Samting Bilong Laef—Wata
JESUS story abaotem wanfala spring wata wea bae givim laef olowe long wanfala Samaritan woman wea tekem wata from wanfala well. (John 4:14) Nomata wata wea Jesus tok abaotem hem tokpiksa wan, olsem oxygen wea barava important samting bilong laef, wata tu hem barava important. Man savve stap laef for tu-thri week nomata hem no kaikai, bat hem savve laef for samting olsem faevfala day nomoa sapos hem no drinkim wata!
Klosap 75 percent long body weight bilong iumi hem wata. Olsem example, brain hem 75 go kasem 85 percent wata, and olketa masol hem 70 percent. Wanfala samting wea wata duim hem helpem iumi for tekem kaikai go insaed body, and karem olketa nutrient go long olketa cell long body. Wata savve aotem olketa poison and nara dirty samting, mekem olketa join and olketa samting long bele go ahed for waka gud, and kontrolem temperature bilong body. Bat waswe, iu savve wei for drinkim inaf wata hem savve helpem man lus weight?
Drinkim Wata for Lus Weight
First samting, wata no garem samting wea savve mekem body fat, and sodium wea insaed hem no staka. Mek-tu samting, hem savve katem daon feeling for laek kaikai tumas. Mek-thri, wata helpem body for aotem olketa gris wea stap insaed body. Hao nao hem duim? Well, taem olketa kidney no garem inaf wata, olketa no savve waka gud. Liver bae duim samfala waka bilong kidney, bat taem hem duim olsem hem stopem paoa bilong hemseleva for aotem olketa gris long gudfala wei. Long wei olsem gris bae go ahed for hipap long body, and man savve kamap fat. Dastawe, olsem Dr. Donald Robertson bilong Southwest Bariatric Nutrition Center long Scottsdale, Arizona, U.S.A., hem sei, “for drinkim inaf wata hem key for lus weight. Sapos pipol wea trae for lus weight no drinkim inaf wata, body bae no savve katem daon olketa gris.”
Hem tru, wei wea body keepim and no letem wata go aot, hem planti taem mekem man baonsa. Dastawe, staka wea kasem datfala problem ting for katem daon wei for drinkim staka wata. Bat, difren samting nao happen. Taem body no garem inaf wata, hem bae trae for keepim evri wata wea iumi tekem insaed body, and bae hem keepim long leg and long hand. Olketa savveman saed long kaikai sei hem gud for givim body bilong iumi wanem hem needim—inaf wata. And no forgetim, taem iu kaikaim staka salt, iu bae needim staka wata for daonem salt wea iu tekem insaed body.
Givim Wata Long Body Bilong Iu
Evriday tu liter bilong wata hem go aot thru long skin, lung, bele and olketa kidney. Evriday taem iumi brith aot iumi lusim 0.5 liter bilong wata. Sapos iumi no drinkim inaf wata for changem, body bae kamap drae. Samfala saen bilong diswan hem hed soa, taed tumas, pain long olketa masol, mimi hem no klin, body hot, and mouth and olketa eye hem drae.
So haomas wata nao iumi shud drinkim? Dr Howard Flaks, wanfala savveman saed long treatment for olketa baonsa, hem sei: “Wanfala healthy person shud drinkim eit kasem tenfala kap wata insaed wanfala day. Iu needim moa wata sapos iu stap long ples wea hem hot or iu man wea savve exercise tumas. And for pipol wea baonsa, olketa shud drinkim wanfala extra glass wata for evri 10 kilogram wea winim normal weight bilong olketa.” Bat samfala sei man savve drink nomoa taem hem laek drink, bat sapos iu barava laek drink tumas, body lusim staka wata finis.
Waswe, samfala difren kaen drink savve changem wata? For drinkim olketa frut and nara kaen juice wea olketa mixim witim wata hem gud, bat hem garem samting wea savve mekem body fat. And tu, olketa drink wea garem staka sugar and milk bae mekem body needim moa wata, from body needim wata for mekem body iusim olketa samting hia. Alcohol witim coffee and tea wea garem caffeine wea savve mekem man mimi tumas, hem mekem man need for drinkim moa wata for changem wata wea hem lusim. No eni samting moa stap wea savve changem evribit datfala barava important samting, wata. So hao, iu laek drinkim wanfala kap wata distaem?
[Box/Piksa long page 13]
Samfala Idea for Drinkim Moa Wata
● Karem witim iu wanfala wata botol.
● Drink evritaem iu kaikai.
● Drink bifor, bihaen, and long taem bilong exercise.
● Taem iu rest from waka, drinkim wata, no coffee.
● For mekem tap wata teist moabeta, mixim witim juice bilong lemon or iusim wanfala filter.
[Credit Line long page 12]
Photo: www.comstock.com